DILI, (TATOLI) – Dili Institute of Tecnology (DIT) liuhusi nia reitór, Manuel Florêncio Vong propoen ba Estadu atu hasa’e Orsamentu Jerál Estadu (OJE) hodi halo investimentu ba área edukasaun gradualmente.
“Tau atensaun ba iha dezenvolvimentu edukasaun, tenke hasa’e gradualmente OGE ba investimentu edukasaun nian husi seis ba dez, quinze to’o vinte no vinte to’o vinte cinco pursentu”, propoen reitór iha Kampus DIT Aimeti Laran, tersa (9/5).
Investe ba edukasaun, nune’e iha 2030, ita bele alkansa duni ita-nia objetivu, Planu Estratéjiku Dezenvolvimentu Nasionál (PEDN). “Ita hotu hakarak atu sidadaun tomak sai sidadaun di’ak no sai eroi ba nasaun Timor-Leste”, hatutan.
Reitór DIT reforsa katak laiha ipoteze seluk, edukasaun tenke sai nu’udar dalan no inuk mesak hodi forma ema sai nu’udar ema hodi sai kapitál umanu kualifikadu no kompetente.
Kapitál umanu ne’ebé nakonu ho koñesimentu, fuan no kle’an iha siénsia no teknolojia no fiar liuhusi prosesu aprendizajen, formasaun métodu pedagoziku, investigasaun sientífika hodi hamosu kreatividade, inovasaun no transformasaun.
“Nune’e sivilizasaun foun, sei mosu mai hodi lori Timor ba mundu no lori mundu mai Timor”.
Atu alkansa mehi boot ida ne’e tenke iha investimentu iha setór edukasaun. “Tuir ami-nia observasaun investimentu públiku Timor-Leste iha setór edukasaun sei ki’ik tebes”, haktuir.
Tanba ne’e DIT propoen ba Estadu atu tau atensaun ba iha dezenvolvimentu edukasaun, tenke hasa’e gradualmente Orsamentu Jerál Estadu (OJE) ba investimentu edukasaun nian.
Jornalista: Rafy Belo
Editora: Rita Almeida
