DILI, (TATOLI) – Primeiru Ministru, Rui Maria de Araújo hateten jornalista timoroan tenke profesionaliza liutan servisu hodi fornese informasaun ho kualidade ba prosesu dezenvolvimentu.
“Husi ne’e ba oin ba prosesu libertasaun povu, jornalizmu ne’ebé ho kualidade no professionál nune’e ajuda dezenvolvimentu rai ne’e ba oin”, dehan nia bainhira halo diskursu ba konferénsia internasionál ne’ebé organiza hosi Konsellu Imprensa iha salaun Delta Nova, kuarta, (10/5).
Lidér governu realsa sei kontinua fó apoiu ba mídia iha Timor Leste hodi garante nafatin liberdade imperensa. “Ami apoiu hela imi no se mak bandu imi hala’o reportajen”. Kontinua kria kordenasaun servisu entre jornalista no mídia di’ak liutan.
Primeiru Ministru rekoñese apoiu jornalista internasionál nain lima ne’ebé mate iha Balibo, jornalista Max Stall, Alan Nairn no jornalista Timoroan seluk ne’ebé apoiu ona informasaun ho kualidade ba libertasaun nasionál.
“Jornalista ne’ebé ho kualidade ajuda ita nia prosesu luta libertasaun nian, ha’u temi jornalista sira ne’ebe fó sira nia vida atu relata faktuais kona-ba invasaun ba ita nia luta libertasaun, profesionalizmu ida ne’e ajuda ona ita nia libertasaun”, rekoñese.
Jornalista: Agapito dos Santos
Editora: Rita Almeida
