DILI, (TATOLI) – Dili Institute of Tecnology (DIT), ohin (10/5) komemora Dies Natalis ba da-XV iha nia ezisténsia nu’udar ensinu superiór iha Timor-Leste (TL).
Komemorasaun tinan ne’e, reitór DIT, Manuel Florêncio Vong halo leitura despaisu reitoriál kona-ba promosaun kareira profesór iha DIT.
Tuir mai, aktu promosaun profesór no impozisaun insígniu profesoriadu no diskursu sientífiku husi profesora doutora Catharina Wiliams Van-klinken ho tópiku: “Desenvolvimentu Lian Tetun hanesan Língua Sientífika”.
Ikus liu mak sei hakotu ho intervensaun husi autoridade akadémiku sira ne’ebé hakna’ar aan iha ensinu superiór ne’ebé hetan ona akreditasaun pursentu 100 husi ANAA (Agência Nacional para a Avaliação e Acreditação Académica) no divertimentu sira.
Tema ba Dies Natalis ba ensinu superiór ho lema: “Matenek Nodi Serbi” iha tinan ne’e mak Investe iha Eselénsia no Peskiza liuhusi Promosaun Kareira Profesór Universitáriu.
Reitór DIT, Manuel Florêncio Vong informa objetivu prinsipál harii DIT nian mak oferese no promove edukasaun ho formasaun iha nível edukasaun hodi hasa’e kualidade umana no integradu husi prosesu aprendizajen.
Hodi dezenvolve teknolojia ho kultura filozófika sientífika, literária no artístika iha área enjeñaria ho ekonomia aplikavel.
Halo formasaun no preparasaun ba profisionál tékniku no sientista sira. Kontribui hodi buka solusaun ba problema interese komunidade nian liuhusi kursu no serbisu komunitáriu, dezenvolve instituisaun sientífika iha área koñesimentu oioin.
Halo difuzaun kona-ba nia hanoin no valór nomós nia fiar. “Inisiativa harii DIT atu banati, hatutan no hada’et nafatin valór eroi pátria sira nian ho valór siénsia no kultura hodi hamosu sivilizasaun foun ba jerasaun futura”, akresenta reitór Manuel Vong.
Komemorasaun Dies Natalis DIT nian ba-XV, horseik hala’o mós misa agradesimentu ida ne’ebé prezide diretamente husi reverendísimu Bispu Dioseze Díli, Dom Virgílio do Carmo da Silva no partisipa mós husi Prezidente Repúblika, Taur Matan Ruak.
Jornalista: Rafy Belo
Editora: Rita Almeida
