DILI, (TATOLI) – Konsellu Ministru aprova dekretu lei kona-ba rejime inskrisaun no obrigasaun kontributivu iha ámbitu kontributivu seguransa sosiál, ohin iha Palásiu Governu.
“Funsionáriu públiku, servisu empreza iha obrigasaun atu kontribui pursentu haat no ema ne’ebé fó servisu kontribui mós pursentu neen”, esplika, Ministra Solidariedade Sosiál (MSS), Isabel Amaral Guterres ba Ajénsia Tatoli hafoin enkontru.
Tuir Ministra, ba Timoroan tomak liu-liu sira ne’ebé servisu iha kompañia iha obrigasaun atu halo kontribuisaun ho pursentu ne’ebé determinadu, enkuantu ema ne’ebé loke kios mós hakarak kontribui di’ak liu tan.
Ema hotu tenke kontribui, kuandu to’o ona idade, hetan asidente ruma, moras nia bele iha ona osan atu bele nesesita maibé bainhira lakohi kontribui nia sei hetan U$30.00 ne’ebé Estadu fó ba ferik no katuas sira.
Nia esplika osan ne’ebé atu kontribui sei responsabiliza hosi Ministériu Solidariedade Sosiál, hosi osan ne’e tau ketak bainhira tempu to’o ona atu reforma nia iha osan atu uza fulan-fulan.
Kuandu ema la kontribui sei iha mós multa. “Ha’u hanesan servisu iha kompañia mak ha’u iha ema hamutuk 200, kuandu kompañia koa osan no sei la-hatama nu’udar kontribuisaun bele selu multa”, esplika.
Durante ne’e, Prezidente Repúblika, Taur Matan Ruak ladauk promulga lei rejime kontributivu maibé konsellu ministru aprova ona dekretu lei, kuandu Xefe Estadu promulga bele halo ninia implementasaun.
Jornalista: Zezito Silva
Editora: Rita Almeida
