TIBAR, (TATOLI) – Autoridade Inspesaun no Fiskalizasaun Atividade Ekonómia, Sanitária no Alimentar (AIFAESA) ho Ministériu Saúde sei halo teste laboratóriu ba foos importasaun ne’ebé rai iha armazein 03 Tibar ho tonelada hamutuk 4.798.575.
Intervensaun ho amostra random foos saku 15 ne’e bazea ba fiskalizasaun ne’ebé halo hosi Parlamentu Nasionál foin lalais ne’e.
“Parte ida ne’ebé ami sei haree husi teste ne’e mak kadar air husi foos refere nomós kadar broken nian”, Diretór Meterolojia no Padronizasaun, José Manuel dos Reis ba jornalista sira iha Tibar, ohin.
Sobre rezultadu teste ne’e sei depende ba prosedimentu ne’ebé iha no bainhira hotu sei relata fali ba públiku.
Prezidente Konsellu Administrasaun Sentru Lojístika Nasionál, Nívio Magalhães informa iha rekomendasaun husi deputadu sira atu presiza halo teste ba kulidade foos tanba ameasa fohuk.
“Tanba ne’e mak ami kontaktu kedan ba Ministériu Saúde nomós AIFAESA atubele mai halo teste ba foos ne’ebé iha. Tuir ami-nia observasaun katak foos iha armazein 03 ne’e nia kondisaun sei di’ak”.
Entantu kondisaun armazein nia hanesan ventilasaun ladún di’ak, manu-liin tama sai no labadain halo saku foos foer maibé presiza tékniku sira atu halo teste rasik hodi bele foti konkluzaun sobre foos di’ak ka aat.
“Ohin AIFAESA mai haree kondisaun foos nian no ami hein rezultadu iha tempu badak atu nune’e Sentru Lojístika Nasionál bele implementa nia programa, tuir planu sei halo iha semana oin, programa intevensaun merkadu”.
Foos importasaun iha armajein 03 Tibar ne’e loloos tonelada 9.000 sosa hosi Vietname ho Orsamentu Jerál Estadu 2015 nian pur volta millaun U$3.740 no tama mai iha tinan 2016. Daudaun ne’e hela de’it tonelada 4.798.575.
Aleinde ne’e armajein 02 mós iha foos importasaun tinan 2017 ho tonelada 1.800 nomós armazein 01 ne’ebé rai produtu lokál haree kulit hamutuk 1.500 ne’ebé daudaun iha prosesu dulas nia laran.
Jornalista: Maria Auxiliadora
Editora: Rita Almeida
