DILI, (TATOLI) – Pároku Parókia Manatuto, Padre Martinho Gusmão hateten saudozu Mário Viegas Carrascalão nu’udar líder istóriku tanba halo polítika la’os atu hadau poder, maibé atu lori ema ba moris di’ak.
“Ninia polítika ne’ebé determina destinu Timor-Leste maka kona-ba diálogu ho FALINTIL iha Larigutu, Ossu, Viqueque, 1983”, dehan Amu Martinho ba Ajénsia TATOLI via email iha nia kna’ar fatin, Parókia Manatuto, sesta ne’e.
Nia haktuir Mário Carrascalão mós loke edukasaun ba jerasaun foun no loke Timor ba mundu atu hetan asesu livre, to’o kulmina iha vizita Santu Padre João Paulo II, 1989.
“Bainhira Amu Papa atu mai vizita Timor, ema barak, liu-liu independentista sira lakohi simu. Padre balun ne’ebé halo klandestina mós hakerek karta kontra Don Carlos F.X. Belo atu labele simu prezensa Amu Papa iha Timor. Maibé, Mário ho Bispu Belo “ulun moruk” simu nafatin Amu Papa”, konta Pe. Martinho.
Amu Martinho informa Mário nia legadu metin iha Timor-Leste tanba nia maka durante sai Governadór Timor-Timur prepara jerasaun intelektuál atu ukun rasik án.
Jornalista: Xisto Freitas
Editora: Rita Almeida
