DILI, (TATOLI) – Prezidente Partidu Sosiál Demokrata (PSD), João Goncalves hateten triste tanba partidu lakon membru no figura di’ak ida, saudozu Mário Viegas Carrascalão.
“Ami sente triste, Partidu Sosiál Demokrata lakon membru no figura di’ak ida”, hatete nia ba jornalista sira iha Ospitál Nasionál Guido Valadares, ohin.
Nia dehan PSD sei ko’alia ho família atu oinsá marka prejensa iha serimonia funebre. “Katuas halo buat barak ba Nasaun no povu tomak”.
Ho simpatizante no estrutura partidu, harohan saudozu deskansa ho dame. Saudozu nu’udar fundadór no prezidente dahuluk ba PSD. Hafoin kongresu tinan kotuk, eis Vise Primeiru Ministru ba asuntu Administrasaun no Bo’a Governasaun hetan kargu prezidente onorariu hosi PSD.
Partidu sei hala’o nia omenazen. “Ita hotu hatene katak joven barak mak sofre hafoin masakre Santa Kruz, nia konsege salva”.
Jornalista: Zezito Silva
Editora: Rita Almeida
