DILI, (TATOLI) – Bispu Diozese Dili, Don Virgilio do Carmo da Silva hatete hakbesik-án ba kapela kuandu lakon esperansa iha moris tanba fatin ne’e Maromak sei rona ita nian problema sira.
“Uma ne’e sai sentru hasoru malu, sentru ksolok nian tanba ne’e bainhira ita lakon esperansa iha moris, hakbesik-án iha fatin ida ne’e, Maromak iha fatin ida ne’e atu rona ita nia problema hodi sai nafatin inspirasaun ba moris”, dehan Bispu bainhira inagura kapela São José Aimeti-laran, parokia São José Aimutin Dili, horseik.
Durante omilia, lider Igreja Diozese Dili ne’e hatutan, kapela furak maibé partisipasaun sarani iha selebarasaun ba vida kristaun menus, uma ne’e laiha valór. Kapela sai sentru ba ema hotu iha bairu ida ne’e hodi hasa’e sira nia fiar.
Bispu agradese ba kontribuisaun sarani sira tanba ho laran luak fó ona kontribuisaun ba konstrusaun ho susesu.
Prezidente komisaun organizadora, Dominggos Caero hateten konstrusaun hetan apoiu osan husi governu ba fundu sosiadade sívil hosi Gabinete Primeiru Ministru, sarani no kompañia ne’ebé partensia ba parokia ne’e.
“Totál orsamentu ba konstrusaun ne’e hamutuk rihun 74 resin no kontrusaun ne’e hala’o durante tinan haat, hahú iha 2013 to’o 2017”, dehan.
Jornalista: Agapito dos Santos
Editora: Rita Almeida
