DILI (TATOLI)—Prokuradór Jerál Repúblika (PJR), José Ximenes, tau esperansa katak, lei númeru 5/2017 (Arma Branka) bele solusiona problema arte marsiál iha Timor-Leste.
“Lei ne’e hatan duni situasaun Timor-Leste hodi responde arte marsiál sira ne’ebé halo problema hodi utiliza arma branka no rama ambon,” PJR José Ximenes hato’o iha nia intervensaun iha Ótel Ramelau, Segunda (05/06).
lei númeru 5/2017 pratika arte marsial sira nian no ritual, arma branka ne’ebé defini iha artigu 2 númeru 1 koalia kona-bá katana, espada no seluk tan, rama ambon kompletamente kriminál liu ho pena durante tinan 4 to’o 8 inklui alterasaun ba kódigu penál iha artigu 11.
Ho ida ne’e reforsa ona servisu Polísia ho Ministériu Públiku nian, atu kriminaliza utilizasaun arma branka. Basa durante ne’e uza de’it rejolusaun la forte atu kriminaliza problema arte marsial.
José husu ba komandante sira hotu atu bele fahe informasaun ba seguransa hotu oinsa ho nia implementasaun, tanba lei ne’e importante ba komandu PNTL atu halo prevensaun, enkuantu la’ós liuhosi sosializasaun de’it teknikamente tun ba sentru treinamentu arte marsial nian atu sira bele komprende di’ak liu tan.
Ho lei ne’e sai baze forte no nu’udar instrumentu ne’ebé ministériu públiku bele uza atu prosesa ema ne’ebé involve iha atividade arte marsial hodi hamosu problema.
“Ha’u felisita governu liuhosi Ministru Interiór, Longinhos Monteiro aprezenta projetu lei iha konsellu ministru no tuir mai hetan aprovasaun hosi parlamentu nasionál,” José Ximenes agradese.
(Jornalista :Zezito Silva)
(Editór : Manuel Pinto)
