DILI (TATOLI)—Diretór no reprezentante UNESCO (United Nation Educational, Scientific and Organization), Shahbaz Khan hateten, presiza asaun urjente hodi kombate mudansa klimátika no nia impaktu sira nu’udar parte ida hosi Objetivu Dezenvolvimentu Sustentável (ODS) 17 reprezenta ajenda sensitividade planeta nian.
“Konserva no responsabiliza hodi uza oseanu no rekursu mariñu ba dezenvolvimentu sustentavel, protesaun rekursu bee moos, ekosistema no kombate disertifikasaun, degradasaun rai no lakon biovidiversidade,” diretór Shahbaz Khan, informa iha Hotel Timor, Kuarta (07/06).
Ajenda ida ne’e rekoñese katak ita sei la atinji Objetivu Dezenvolvimentu Sustantável bainhira ita la tau konsiderasaun ba buat rua hanesan ema no planeta.
Implementasaun ne’ebé sentraliza iha ema no ajenda sensitividade planeta bolu atu ita halo integrasaun ba dimensaun tolu sustentabilidade nian (sosio-ekonomikál-ambiente).
ODS 17 mós kria dezáfiu no oportunidade ba rejiaun hotu no mundu no espesifikamente liu, Ázia no rejiaun pasífika sira tenke serbisu maka’as hodi hetan susesu iha nia implementasaun.
Reprezentante UNESCO Jakarta nu’udar Sentru ba Siénsia Rejionál ba Ázia no Pasífika halo serbisu maka’as hodi hatuur ajenda dezenvolvimentu global iha polítika nível altu Ázia no Pasífika iha tinan barak liu ba liuhusi asaun no atividade oioin.
“Atividade no asaun hirak ne’e ajuda ona kria rede ne’ebé di’ak ba rekursu umanu no instituisaun sira husi area diferente iha mandate UNESCO nian,” nia informa.
Diretór Shahbaz Khan informa katak inisiativa husi Sentru ba Siénsia Rejionál ba Ázia no Pasífika ne’ebé hala’o dadaun mak hanesan lansa fasilidade hodi aselera siénsia no teknolojia ka hanaran FAST (Facility for Accelereting Science and Tecnology) iha rejiaun.
FAST nu’udar kondutór prinsipál husi dialogu no asaun hodi hatuur Ázia no Pasífika iha pozisaun ne’ebé di’ak liu iha siénsia no teknolojia no ODS nian.
Tuir mai mak Workshop dahuluk APFAST ne’ebé lansa ohin iha Hotel Timor ne’ebé nia programa lori matenek na’in sira husi Ázia no Pasífika hodi halo dialogu atu identifika forsa, dezafiu no oportunidade kapasidade Siénsia no Teknolojia (SETI) iha rejiaun hodi suporta implementasaun ODS iha nível nasionál, fokus ba programa UNESCO nian.
Nune’e mós identifika inisiativa atu otimiza nível SETI nian ba implementasaun ODS iha planu dezenvolvimentu nasionál.
Matenek na’in husi rejiaun Ázia no Pasífika reprezenta husi ema na’in sia ne’ebé mai husi Bangladesh, Cambodia, Pakistaun, Filipina inklui Timor-Leste rasik.
(Jornalista: Rafy Belo)
(Editór : Manuel Pinto)
