DILI, (TATOLI) – Vise Prezidente Corporate Business Developmet Sucufindo, PT Superintending Company of Indonesia (Persero), A. Iskandar K. hatete prontu ajuda no fahe siénsia e esperiénsia ba Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) tanba iha papél ne’ebé importante atu garante sirkulasaun ba kualidade sasán liuliu hahán no hemun iha Timor-Leste.
Relasiona kresimentu ekonomia iha Timor-Leste kontinua sa’e, nune’e nesesidade sosiedade ba konsumu alimentasaun tenke garante kualidade.
“Ida ne’e importante tebes tanba kualidade hahán ne’e influénsia tebes ba kualidade rekursu umanu”, Iskandar dehan iha Matadouru, ohin, hafoin asian akordu ho AIFAESA iha parte laboratóriu.
Hahán ne’ebé sirkula mak lagarante kualidade, sei difisil liu atu halo avaliasaun. Tuir nia laboratóriu AIFAESA ne’ebé sei iha ne’e, importante no kruziál liuliu atu garante hahán no hemun hotu ne’ebé sei apropriadu ho nesesidade ne’ebé rekezitadu ona husi Governu.
“Daudaun ne’e Governu Timor-Leste dezenvolve estandarte nasionál balun inklui hahán no serteza katak AIFAESA sei hatudu ezisténsia, nune’e hamosu vantajen pozitivu iha sosiedade”.
Sucufindo iha esperiénsia tanba harii iha 1956, iha liña laboratóriu boot liu ne’ebé prontu atu fó siénsia no esperiénsia ba AIFAESA.
Jornalista: Maria Auxiliadora
Editora: Rita Almeida
