DILI (TATOLI)—Sekretária Ezekutiva CPLP (Comunidade dos Países da Língua Portuguesa), Maria do Carmo Silveira hateten katak atu halakon hamlaha no ki’ak hodi alkansa objetivu seguransa alimentár nian, estadu membru CPLP hamutuk hodi promove seguransa alimentár no nutrisionál.
“Ita hotu nia responsabilidade,” hateten sekretária ne’e hodi diriji ba reprezentante estadu membru sira iha reuniaun daruak ekstradordiária Konsellu Seguransa Alimentár no Nutrisionál CPLP nian ne’ebé hala’o iha Brasilia, foin lalais ne’e, haktuir nota informativa CPLP.
Atu halakon hamlaha no ki’ak, estadu membru hotu nia dever no misaun hodi asume ho forma solidária hodi halo kontribuisaun desiziva ida ba nia konkretizasaun.
CPLP tau rekursu, teknolojia no koñesimentu atu kria kondisaun minima hodi husik kestaun ne’e la sai paradigmátiku nune’e bele atinji komprímisu polítiku ne’ebé asume ona.
“Tanba ne’e, presiza reafirma sen rezerva hasoru dezafiu,” afirma sekretária CPLP husi nasaun belun São Tomé e Príncipe ne’e.
Eis-governadora Banco Central de São Tomé e Príncipe ne’e akresenta CONSA-CPLP afirma nu’udar plataforma dialógu impar iha komunidade ho dalen ofisiál portugez.
“Ita hotu, hanesan membru governu, parlamentár, organizasaun sosiedade sívil, reprezentante setór privadu, universidade no tempu badak reprezentante poder lokál tuur iha meza ida hamutuk,” realsa eis-governadora ne’e hodi hakotu.
Entretantu, antes ne’e, iha 2014 simeira da-sanolu xefe estadu no governu CPLP nian kona-ba halakon hamlaha no ki’ak hala’o mós iha Díli, Timor-Leste bainhira asume prezidénsia rotativa CPLP nian.
Informasaun relevante, klik: https://www.youtube.com/watch?v=QgqZLaOW6BU
(Jornalista: Rafy Belo, Editor : Manuel Pinto)
