DILI, (TATOLI) – Diretór Jerál Ministériu Edukasaun (ME), Antoninho Pires hatete autoridade sira iha Cabo Verde konsidera timoroan sira ne’ebé hela no estuda iha ne’ebá la’ós estranjeiru maibé nu’udar Caboverdiano.
Kazu ne’ebé akontese ba estudante timoroan sira la’ós organizadu. “Iha duni akontesementu balun ba estudante sira maibé la’ós organizadu maibé iha sidade boot sira sempre akontese hanesan ne’e”, informa Antoninho Pires ba ajénsia Tatoli iha Ministériu Negósiu Estranjeiru no Kooperasaun (MNEK), Praia dos Coqueiros, iha fin-de-semana ne’e.
Estudante sira informa situasaun inseguru, maibé tuir universidade no ME Cabo Verde nian kondisaun normál no apoiu nafatin estudante sira no konsidera la’ós hanesan estranjeiru.
“Ami (Caboverdiano) serbi sira hanesan mós serbi caboverdiano sira, informasaun ne’ebé ami rekolla iha terenu mak ida ne’e”, relata diretór ME ne’e hodi haktuir autoridade caboverdiana sira-nia afirmasaun.
Diretór Antoninho Pires mós informa katak situasaun estudante sira nian, prosesu la’o tuir kondisaun nasaun belun CPLP (Comunidade dos Países da Língua Portuguesa) ne’e nian.
“Ne’e mak informasaun ne’ebé ami hetan husi estudante sira. O que interesse, informasaun ne’ebé ami hetan la’ós de’it mai husi estudante maibé mós husi universidade. Ami konsege enkontru no sira depozita nafatin konfiansa”, tenik.
Hodi kontinua relata nasaun áfrikana, belun Timor-Leste ne’e depende ba desizaun no haktuir katak kontinua firme nafatin serbi estudante timoroan sira hanesan mós Caboverdiano sira.
Kona-ba aprendizajen estudante sira nian, nia informa: “Estudante sira ezize atu sai husi ne’ebá maibé ministru hola ona desizaun tuir relatóriu ne’ebé ami hato’o, depois ministru analiza hola desizaun katak manten iha Cabo Verde mak depois haree fila fali ho estadu Cabo Verde, parte seguransa nian”, informa tan.
Estudante bolseiru timoroan ne’ebé hala’o sira-nia estudu iha nasaun belun Cabo Verde ne’e, adidu edukasaun Timor-Leste nian iha Lisboa, Portugal mak tau-matan nomós vizita estudante timoroan hirak ne’e periodikamente.
“Adidu edukasaun mak iha kredensiál ba ne’ebá”, informa tan.
Entretantu informasaun antes ne’e katak estudante sira hetan asaltu husi ema deskoñesidu tanba ne’e ME orienta nia diretór jerál, Antoninho Pires hodi ba observa no haree direta situasaun ne’e.
Jornalista: Rafy Belo
Editora: Rita Almeida
