DILI, (TATOLI) – Sekretariu Estadu Konsellu Ministru, Avelino Coelho informa, reuniaun Konsellu Ministru, ohin, aprova rihun 500 ba programa Tour de Timor (kompetisaun bisikleta 2017).
“Ministra Finansa, Santina Cardoso aprejenta rezolusaun governu konaba oinsá apoiu finanseiru ba programa Tour de Timorʺ, dehan governante ne’e iha Palásiu Governu.
Biban hanesan, Sekretáriu Estadu Juventude no Desportu, Leovigildo Hornay hateten orsamentu ne’e sei ezekuta husi gabinete eis Prezidente Repúblika, José Ramos Horta ba Programa Tour de Timor 2017.
ʺSekretáriu Estadu Juventude no Desportu maka sei akompaña ninia prosesu ezekusaunʺ, esplika.
Programa ne’e sei hala’o iha fulan-setembru, inisia hosi eis Prezidente Repúblika, Josè Ramos Horta iha 2009 hodi promove dame.
Partisipante 300 husi nasaun 12 mak Azean, Austràlia, Europea no seluk tan maka kompete iha 2009 ho distansia kilometru 450, haleu teritoriu Timor-Leste.
Governu Aprova Subsidiu Ba Grafika Nasionál
Avelino Coelho hatutan, governu mós aprova subsidiu ba funsionariu Grafika Nasionál ne’ebé halo servisu extra hodi prodús buletim votu ba eleisaun parlamentár.
ʺAsuntu ne’e aprezenta husi Prezidensia Konsellu Ministru atu halo pagamentu suplementár ba funsionariu grafika nian ne’ebé servisu oras extra iha imprisaun buletim de votu”.
Funsionariu hirak ne’e hahú servisu extra oras 24, hahí loron 22 fulan-juñu to’o 14 fulan-jullu. Maibé governante ne’e la-esplika montante oorsamentu ne’ebé governu aprova.
Jornalista: Agapito dos Santos
Editora: Rita Almeida
