DILI (TATOLI)-Rezultadu debate governu no estadu membru CPLP (Comunidade dos Países da Língua Portuguesa) liliu Ministériu Turizmu ne’ebé hala’o iha Brasil, Kinta (29/06), kona-ba Objetivu Dezenvolvimentu Sustentável (ODS) hamosu deklarasaun Foz do Iguaçu, Brasil no foti ODS sai nu’udar komprimisu ajenda 2030.
Ajenda 2030 konsentra liu ba ODS númeru 8 (traballu dignu no kresimentu ekonómiku), 12 (produsaun no konsumu sustentável) no 14 (proteje vida marítima).
Iha parte seluk objetivu CPLP nian, reforsa lasu solidariedade no kooperasaun ne’ebé mak halibur no konjuga inisiativa sira kona-ba promosaun dezenvolvimentu ekonómiku no sosiál husi povu idaidak.
Desizaun husi deklarasaun finál reuniaun da-sia husi ministru turizmu no reprezentante husi governu no estadu membru organizasaun luzófona ne’e, kona-ba ODS, rekoñese no salienta impaktu direitu turizmu, maibe sei implementa polítika públika no boas prática sira iha partisipasaun sosiál, transparánsia no integridade ne’ebé mak promove turizmu sustentável, hodi kria serbisu dignu no insentiva kultura no produtu lokál sira.
Estimula promosaun investimentu iha turizmu sustentável, inklui ekoturizmu no turizmu kulturál, promove dezenvolvimentu, aplikasaun no uzu teknolojia informasaun no komunikasaun foun iha setór turizmu.
Tuir mai mak, insentiva ambiente ida ne’ebé favorável ba kriasaun empreza ki’ik no media no fasilita asesu ba finansiamentu liuhusi inisiativa mikrokréditu ba populasaun ne’ebé ki’ak liu no ba komunidade lokál sira iha área ne’ebé ho poténsia ekoturizmu aas liu.
Promove interkámbiu asaun no dialógu artikuladu no estruturadu ho sorumutu ministerial setorál sira CPLP nian ne’ebé nia ajenda kontribui ba implementasaun rezolusaun sorumutu ministeriál ne’e.
Seluk mak, halo esforsu hodi aprova planu estratéjiku kooperasaun turizmu iha CPLP, ne’ebé mak sei lori ratifikasaun ad referendum da XXII Reunião Ordinária Konsellu Ministru CPLP nian ne’eb’e hala’o iha Brasília, 20 jullu 2017.
Hamosu esforsu hodi aprova planu asaun iha reuniaun ministru turizmu CPLP nian ba biéniu 2017-2019.
Entretantu, deklarasaun ne’e hetan rekoñesimentu husi governu no estadu membru husi CPLP ne’e rasik no Timor-Leste reprezenta husi nia embaixadór iha Brasil, Gregório de Sousa.
Notísia relevante, http://www.tatoli.tl/2017/06/cplp-sei-debate-turizmu-no-dezafiu-implementasaun-ods/
Deklarasaun Foz do Iguaçu, bele mós asesu iha link ne’e: https://www.cplp.org/id-4447.aspx?Action=1&NewsId=5167&M=NewsV2&PID=10872
(Jornalista: Rafy Belo, Editór : Manuel Pinto)
