DILI, (TATOLI) – UNILAB (Universidade da Integração Lusofonia Afro-Brasileira) organiza konkursu “MISS & MISTER UNILAB 2017” ba estudante CPLP (Comunidade dos Países da Língua Portuguesa) kona-ba promosaun beleza no diversidade kulturál, iha Brasil.
Partisipante konkursu, Januario Fernandes informa nia tuir konkursu ne’e hodi promove kultura Timor-Leste (TL) no hetan inspirasaun husi saudozu Nino Konis Santana.
Katak, “povu ida ne’ebé maka la iha identidade kulturál, la’ós povu. Povu ida, atu atinji nível avansadu ba dezenvolvimentu ne’e tenke hasa’e ninia nível kultura”.
Nia hatutan: “Ita nu’udar povu Timor-Leste, prezerva ita-nia kultura, hanesan fátor ida ba ita-nia unidade”.
Bolseiru ba kursu CNeM (Ciência da Natureza e Matemática) ne’e ba ajénsia Tatoli, ohin liuhusi komunikadu sita nafatin saudozu Konis Santana nia liafuan katak “preserve os valores tradicionais, que seja um fator de unidade e que leve os outros povos a respeitar a sua independência” ka prezerva tradisaun nia importánsia ne’ebé bele sai fátor ida ba unidade no lori povu sira seluk hodi respeita ninia independénsia.
Tuir nia, alende promove kultura, hetan mós esperiénsia hodi aumenta matenek, tanba matenek ne’e la’ós hetan husi estuda de’it maibé husi meios oi-oin.
Alende ne’e, Brígida da Silva Pinto e Cruz hanesan mós konkorente haktuir, sente orgullu nu’udar timoroan hodi partisipa atividade ne’e.
“Importante mak ha’u mergulla iha ha’u-nia beleza naturál ba publiku nu’udar feto timoroan katak “eu sou como eu sou”, ha’u-nia naturalidade mai husi natureza no ansestralidade pasífika bonita no naturál”, hateten konkorente númeru 3º husi Uatolari, suco Matahoi, uma lisan Sae-lari ne’e.
Konkorente timoroan ne’ebé konsege tama finál ne’e mós informa, atu manan ka lakon, nia fiar iha nia simpatia, amizade no hatudu ba juradu sira katak nia bele sai “MISS OU MISS SIMPATIA-UNILAB-2017”.
“Bainhira ha’u sa’e iha pasarela konfiante no preparada no ha’u tau iha prátika hodi hatudu katak ha’u bele ha’u reprezenta nu’udar ”MISS DO MEU PAÍS ka MISS TIMORENSE” ba publiku”, dehan bolseira timoroan ne’ebé mós estuda iha kursu CNeM (Ciência da Natureza e Matemática) ne’e.
Nia hatutan, ba tipu konkorénsia ida ne’e nia preparadu atu manan no atu lakon maibé motivu prinsipál mak mergulla iha orgullu nu’udar timoroan.
“Ha’u hatene di’ak tebes no konsiente katak iha MISS balun ne’ebé bele nabilan liu ha’u, entretantu, ha’u prerparada ba iha Gala Finál”, hateten kazada ne’ebé hela iha Lakoto, Balibar.
Hodi akresenta antes ne’e nunka mehi ba konkorénsia ne’e no konkorénsia ne’e nu’udar esperiénsia dahuluk. Mosu iha nia hanoin katak hakarak koko no haree ba karákter nu’udar timoroan iha ema seluk nia leet. Nune’e mós hili hodi konfia ba amizade nomós fiar iha vida.
“Ha’u aprende buat hotu ne’ebé mak mosu iha ha’u-nia oin mezmu difísil. Ha’u buka hatene no presiza hatudu no demostra mós ha’u-nia aktu konvivénsia iha komunidade akadémika UNILAB”, konklui primeiru estudante timoroan ne’ebé tama iha UNILAB, iha 25 maiu 2001 ne’e.
Entretantu, UNILAB nu’udar Universidade Da Integração Internacional Da Lusofonia Afro-Brasileira, ensinu superiór ida ne’ebé kompostu husi nasaun hitu no nia ezisténsia foin tinan hitu hahú harii iha 20 jullu 2010.
Nune’e mós konkursu hahú kria iha universidade ne’e ho objetivu hodi hanoin ba beleza sira husi diversidade kulturál no projetu ba estensaun “Cidadania e Interculturalidade Lusófona no Maciço de Baturité”. Projetu ne’e rasik koordena husi koordenadór Polítika Afirmativa, profesór Carlos Subuhana.
Jornalista: Rafy Belo
Editora: Rita Almeida
