DILI (TATOLI)— Prezidente Alumni Parlamentu Foinsa’e Timor-Leste (APFTL), Zaulino Gomes da Silva informa katak APFTL serbisu hamutuk ho SEJD (Sekretáriu Estadu Juventude no Desportu) organiza kompetisaun sertame ba estudante sekundáriu neen iha Díli laran.
Eskola neen hanesan eskola São Pedro, Eskola Sagrado Coração de Jesus (SACROJES), Eskola Sekundáriu 4 Setembro-Balide, Eskola Anur, Eskola Nobel da Paz nó mós Eskola Tékniku informátika (ETI).
“Hanesan mós joven, ne’e hanesan espasu ida atu sira mai espresa mós sira-nia matenek, sira-nia abilidade, sira bele hatudu saida mak sira hatene kona-ba istória Timor-Leste, konstituisaun RDTL (Repúblika Demokrátika Timor-Leste) no edukasaun sívika,” informa prezidente APFTL, Zaulino Gomes da Silva ba ajénsia Tatoli, iha Uma Biti Boot, SEJD, Lesidere, Dili, ohin.
Ekipa juri ba atividade kompetisaun sertame ne’e reprezenta husi SEJD nomós APFTL. Kritériu avaliasaun mak bainhira konkorrente sertame fó resposta loos hotu, valór 100 no la loos zero. “Depende sira-nia matenek oinsa atu fó resposta,” informa prezidente APFTL ne’e.
Prémiu ba manan na’in sira iha tipu rua mak hanesan taxa no osan. Primeiru lugar 400 dolár, segundu lugar 300 dolár no terseiru lugar 200 dolár inklui mós taxa sira. “Ne’e la’ós sasukat ida maibé inspirasaun hodi fó de’it apresiasaun,” tenik alumni Zaulino Gomes.
Nia mós enkoraja ba foinsa’e no konkorente sira katak nu’udar ba joven sira buka espasu no oportunidade atu bele envolve no partisipa ho ideia, ho asaun atu depois bele dezenvolve aan, dezenvolve kapasidade no abilidade atu nune’e bele prepara aan ba futuru.
Nune’e bele sai futuru inan-aman ne’ebé mak di’ak, sai lider ne’ebé mak di’ak hodi sai util ba família no nasaun ida ne’e. Tanba ne’e tenke gasta tempu barak atu aprende no aprende nafatin. “Nu’udar joven, ikus liu ba joven sira hotu labele kaben sedu,” sujere Prezidente APFTL, Zaulino Gomes da Silva.
Entretantu, prezidente APFTL informa mós katak komemorasaun loron mundiál foin sa’e ne’ebé monu iha 12 Agostu ne’e APFTL ho apoiu husi SEJD organiza ho atividade hanesan semináriu, doasaun raan, kompetisaun sertame no marsa ba dame no saudável durante loron haat.
“Ho fundu treze mil trezentos e vinte e sete dolár e vinte cinco centavos hetan apoiu husi SEJD,” relata prezidente APFTL ne’e.
(Jornalista: Rafy Belo)
(Editór : Manuel Pinto)
