DILI, (TATOLI) – Prezidente Bankada Kongresu Nasionál Rekonstrusaun Timor (CNRT-sigla portugés), Natalino dos Santos deklara deputadu bankada CNRT nain 30 entrega hikas kareta prado 30 ba Parlamentu Nasionál (PN).
“Konferensia imprensa ne’e atu deklara katak entrega hikas kareta 30 hosi deputadu nain 30 iha bankada CNRT nian hodi la kontinua tuir prosesu alineasaun (transferénsia) ba kareta Parlamentu Nasionál”, afirma Prezidente Bankada CNRT ba jornalista sira iha sala bankada, ohin.
Bankada CNRT husu ba Prezidente PN atu kansela prosesu alineasaun kareta PN nian ba deputadu 65.
Bankada CNRT husu ba públiku atu kria situasaun pás no hakmatek, matan moris neon nain hodi fó apoiu másimu ba prosesu formasaun governu no prosesu negosiasaun tasi Timor ne’ebé mak la’o hela.
Tanba ne’e, hafoin bankada CNRT tetu didiak situasaun atuál ne’ebé hamosu polémika boot iha públiku kona-ba prosesu alineasaun kareta PN no haree ba desizaun prezidente PN hodi suspende prosesu alineasaun bankada CNRT hodi tetu ba desizaun Konsellu Polítika Nasionál no Konsellu Diretiva Nasionál partidu CNRT nian.
Bazeia ba dekretu lei númeru 32/2011 2017 jullu kona-ba jestaun no alineasaun ba bens moveis estadu no lei númeru 12/2017 kona-ba lei organizasaun no funsionamentu administrasaun parlamentár liuhosi Konsellu Administrasaun PN kompostu hosi reprezentante deputadu bankada CNRT, Frente Revolusionariu Timor-Leste Indepéndente (FRETILIN), Partidu Demokrátiku (PD) no Frente Mudansa.
Reprezentante administrasaun PN hodi deside atu halo prosesu alineasaun nian tanba durante mandatu tinan lima nia laran, deputadu sira partisipa kustu manutensaun anuál kareta PN tuir desizaun konsellu administrasaun ne’ebé haktuir iha akta reuniaun konsellu administrasaun refere.
Jornalista: Zezito Silva
Editora: Rita Almeida
