DILI, (TATOLI) – Hahú 25 agostu tinan ne’e, Uma Amérika ne’ebé lokaliza iha Universidade Nasionál Timor Lorosa’e (UNTL) sei loke no fasilita programa lian inglés hodi fahe koñesimentu kona-ba inglés báziku nian ba menor idade sira.
Koordenadór Uma Amérika, Ezaquiel Ribeiro informa programa ne’e pilar importante ida husi Uma Amérika nian.
“English for kids (inglés ba labarik) ami kria hanesan atividade hodi fahe koñesimentu kona-ba inglés báziku ba labarik sira ne’ebé seidauk iha koñesimentu, iha oituan no la iha kona-ba inglés”, Ezaquiel Ribeiro ba ajénsia Tatoli iha Uma Amérika, Kampus Ekonomia-UNTL, Resende-Díli, ohin.
Atividade ne’e sei hahú hosi tuku 15.00 to’o 16.00 mak hatoman labarik sira hodi komprende katak língua inglés ne’e lian franka katak ema hothotu bele ko’alia. Aprende inglés ajuda ema hetan oportunidade no oportunidade ne’e bele boot.
“Se ita komesa kedas husi labarik ki’ikoan sira-nia chance (oportunidade) ne’e boot liu tanba sira ki’ik oan, sira bele kapta lais”, esplika vantajen husi lian ne’ebé konsagra iha konstituisaun Timor-Leste, artigu 159 (lian serbisu nian).
Kursu ba labarik sira ne’e, hahú hosi tinan sia to’o 12 katak sira ne’ebé estuda iha ensinu báziku no pré-rekizitu mak Uma Amérika simu sei tolera simu de’it labarik tinan hitu. Tinan hitu mai karaik labele .
“Maibé, ninia rekizitu seluk tan sira benvindu atu bele tuir programa inglés ba labarik sira”, Koordenadór Ezaquiel Ribeiro esplika tan.
Kuríkulu ne’ebé sei uza hodi fasilita programa inglés ba labarik, voluntáriu Uma Amérika serbisu hamutuk ho embaixada Estadu Unidu Amérika (EUA), iha Timor-Leste hodi formaliza kuríkulu nia lala’ok.
“Sira tuur hamutuk antes sira halo teaching programme (programa hanorin). Kuríkulu ne’e jeralmente uza kuríkulu ne’ebé babain hanorin na’in dalen inglés sira uza hodi hanorin labarik sira”, akresenta.
Uma Amérika prefere partisipante ba programa inglés ba labarik sira barak liutan tan iha espasu sufisiente. “Programa ne’e programa kontinuasaun. Sira ne’ebé hotu ona bele ba fali nível segundu”, informa.
Koordenadór Uma Amérika, Ezaquiel Ribeiro informa tan katak problema ne’ebé sira hasoru mak voluntáriu ne’e atu dinamiza programa inglés ba labarik ne’e rekruta fali tan voluntáriu sira ne’ebé antes ne’e iha fatin ne’e barak hetan oportunidade hodi ba kontinua estudu ona iha rai li’ur.
“Ne’ebé, ami labele kontinua ho sira”, Koordenadór Ezaquiel Ribeiro relata hodi hato’o razaun rekruta fali voluntáriu foun.
Ho kestasun ne’e Uma Amérika agora prepara hela programa ida hodi bele hanorin fali voluntáriu foun molok hala’o kna’ar hodi fasilita programa inglés ba labarik sira. “Atu iha koñesimentu balun atu bele transfere koñesimentu ba labarik sira”, nia haktuir.
Voluntáriu ba programa inglés ba labarik sira iha Uma Amérika na’in hamutuk na’in 14 mai husi lisensiadu departamentu inglés husi universidade públiku no privada sira iha Díli laran maibé barak liu mai husi UNTL.
“Ami simu sira tan sira iha tiha ona inglés báziku no mai reforsa tan atu sira kontinua hala’o programa”, informa.
Voluntáriu sira mai husi universidade oioin atu iha posibilidade sira bele atria tan sira-nia maluk mai hodi asesu Uma Amérika ne’ebé lokaliza iha UNTL ne’e hodi kumprende importánsia aprende no kumprende lian Inglés.
“Língua inglés ne’e língua globál. Ita-nia konstituisaun mós fó dalan atu sidade hotu aprende”, esplika.
Hodi reforsa papel nu’udar jestór hato’o mensajen ba joven sira katak presiza aprende língua inglés tanba oportunidade iha língua inglés ne’e barak tebes. Bolsu estudu ba iha língua inglés ne’e barak tebes.
Entretantu alende programa inglés ba labarik, tuir planu Uma Amérika sei loke mós programa ba foinsa’e sira, iha nível médiu ne’ebé espesifikamente hala’i liu ba “Speeling Grammar” no seluk tan.
Jornalista: Rafy Belo
Editora: Rita Almeida
