DILI, (TATOLI) – Movimentu Universitáriu Timor-Leste (MUTL) kontinua husu ba Parlamentu Nasionál (PN) atu anula rezolusaun kona-ba leilaun kareta Prado la’ós suspende alineasaun.
José Rui reprezentante ida husi MUTL hateten, sei luta nafatin hodi buka lia loos ba povu no nasaun relasiona ho folin kareta Prado ne’ebé antes ne’e atu leilaun ho dolár 8.000 husi kada kareta ba membru 65 ne’ebé inísiu mandatu hola ho folin dolár 63.000 kada unidade.
“Ami husu hodi hetan lialoos ba povu ida ne’e, rai ida ne’e, nune’e jerasaun futuru mai labele terus”, afirma José Rui iha Universidade Nasionál Timor Lorosa’e (UNTL), Kampus Ekonomia, Resende, sesta, (25/8).
Nia reforsa, kareta Prado ne’ebé deputadu sira uza durante mandatu tinan lima hodi reprezenta povu iha uma fukun PN sei justu liu fó ba patrimóniu estadu mak halo leilaun.
“Halo anulasaun ba rezolusaun depois entrega ba patrimóniu estadu ida ne’e mak MUTL bele dehan katak justu”, akresenta.
Razaun halo anulasaun ne’e, tan tuir nia la tuir prosedimentu ne’ebé prevé ona iha dekretu lei 32/2011 kona-ba jestaun no alineasaun ba patrimóniu movel sira estadu nian.
MUTL mós hato’o sira-nia aspirasaun liuhusi puízia no knananuk timoroan nian. Puízia ida husi puízia barak ne’ebé ajénsia Tatoli asesu mak ho nia títulu “Demokrasia”.
Ha´u-nia naran Maubere
Ha’u moris iha illa ki’ik lafaek. Ne’ebé naran aswa’in tebes no naran boot lemorai
Ha’u lafaek nia na’in. Ha’u mak na’in illa ki’ik Timor
Uluk ema hadau ha’u rain, ha’u tasi. Ha’u-nia rikusoin no ha’u-nia ema aswa’in sira
Ha’u luta kontra ema sira ne’e ho prosesu naruk
Nakonu ho terus, susar. Kanek, fakar ran no mate
Ha’u atinji liberdade iha ha’u-nia horik fatin
Liberdade ba povu maubere, buibere
Ha’u rain liberdade, la’o iha dalan demokrasia
Demokrasia ne’ebé la iha valór
Demokrasia ne’ebé hanehan fali povu maubere, buibere
Demokrasia ba esplora povu ki’ik, ki’ak no mukit
Demokrasia ba viola direitu umanu
Demokrasia ba ignora identidade
Demokrasia ah, demokrasia ditadura borjuista
Demokrasia ba subar malu iha dalan korupsaun, kolusaun no nepotizmu
Demokrasia ba lia bosok, demokrasia ba hariiku aan, demokrasia ba buka di’ak
Liberdade ho demokrasia la iha valór
Liberdade ba ukun na’in
Ha’u mak buibere maubere nia illas
Ha’u haree ona
Ha’u rona ona sá mak sira ko’alia,
Ha’u sei hapara sira
Ha’u sei harahun moru demokrasia ne’ebé hamosu koloniál foun iha ha’u rain
Ha’u sei lori ha’u rain, ha’u emar ba dalan liberdade no demokrasia loloos
Entretantu, bankada haat iha PN hanesan Kongresu Nasionál Rekonstrusaun Timor (CNRT-sigla portugés), Frente Revolusionariu Timor-Leste Indepéndente (FRETILIN), Partidu Demokrátiku (PD) no Frente Mudansa aseita ona hodi suspende alineasaun kareta prado.
Desizaun ne’e deklara liuhusi prezidente PN, Aderito Hugo da Costa.
Jornalista: Rafy Belo
Editora: Rita Almeida
