DILI, (TATOLI) – Prezidente Partidu Libertasaun Populár (PLP), Taur Matan Ruak hateten la kle’ur tan partidu tolu (FRETILIN, PLP no KHUNTO) sei hetan akordu prinsípiu ida ba formasaun governu.
“Ami garante ba Prezidente Repúblika katak diskusaun la’o no la kle’ur tan sei hetan akordu prinsípiu ida ne’ebé asenta koligasaun ne’ebé sei forma”, informa Matan Ruak ba jornalista sira iha Palásiu Prezidensiál Nicolau Lobato hafoin hasoru malu ho Prezidente Repúblika, Francisco Guterres Lú Olo, ohin.
Nia dehan, akordu ne’e ninia signifikadu mak viabiliza formasaun sétimu governu tanba iha pasu ne’ebé di’ak loos.
Nia hatutan loron ida dokumentu kona-ba koligasaun ne’e sei fó sai ba públiku, maibé agora seidauk asina.
“Kuandu partidu tolu hanesan FRETILIN, PLP no KHUNTO asina ona dokumentu ba koligasaun ninian, públiku tomak sei asesu”, realsa.
Tuir nia akordu ne’e lori tempu tanba ne’e la’ós hanesan etu tau ba ibun tolan kedas. Ne’e liga ba nasaun ida nia moris no povu, tan ne’e tenke deskuti didi’ak.
Iha biban hanesan, Prezidenti Partidu KHUNTO, Armanda Berta dos Santos ho nia estrutura mós hala’o enkontru ho Xefe Estadu Lú Olo no konfirma katak KHUNTO kontinua konsistente hodi halo koligasaun ho FRETILIN.
Estrutura PLP no KHUNTO hala’o sorumutu ho Prezidente Repúblika tanba konvida hosi Prezidenti Repúblika atu rona partidu rua ne’e nia hanoin kona-ba prosesu diskusaun formasaun governu ne’ebé partidu tolu hala’o hela.
Jornalista: Xisto Freitas
Editora: Rita Almeida
