DILI, (TATOLI) – Prezidente Banku Sentrál Timor-Leste (BSTL), Abraão de Vasconselos esplika Timor-Leste seidauk bele produs osan-tahan tanba Lei Orgániku BSTL ninian hateten bainhira seidauk iha alterasaun ba uzu moeda, entaun kontinua uza osan dollar amerikanu.
“Ita uza osan-tahan bainhira ita iha moeda rasik. Ida ne’e hateten hosi Lei Orgániku Banku Sentrál ninian”, informa ba jornalista sira iha Palásiu Prezidente Repúblika Nicolau Lobato, Bairu-Pité, tersa ne’e.
Nia esplika tan bele halakon osan Amérika nian iha Timor maibé presiza halo estudu vantajen no dezvantajen entermu ekonomia.
Nia hatutan Lei Orgániku fó biban ba TL atu iha moeda rasik bainhira de’it kuandu hakarak.
Kona-ba transasaun moeda sentavu iha nasaun estranjeiru, Abrão hatán, Timor-Leste nia moeda ne’e bele uza iha nasaun seluk hanesan iha Indonézia kuandu nasaun refere hakarak.
Nia tenik valór ida sentavu 200 ne’e hanesan hanesan mós dollar rua amerikanu. Tanba ne’e, pur-ezemplu, kuandu Indonézia aseita ida ne’e, laiha problema.
Abraão haklaken kompañia ne’ebé produs osan (koin) Timor nian ne’e hosi Austrália e manán tender hosi BSTL iha tinan kotuk hodi produs koin durante tinan tolu nia laran ne’ebé sura hosi tinan kotuk.
Jornalista: Xisto Freitas
Editora: Rita Almeida
