DILI, (TATOLI) – Xefe bankada partidu Frente Revolusionariu Timor-Leste Indepèndente (FRETILIN), Francisco Miranda Branco hateten ninia parte sei altera rejimentu Parlamentu Nasionál hodi involve partidu Kongresu Nasionàl Rekonstrusaun Timor (CNRT-sigla portugès) no Partidu Libertasaun Populàr ba Vise Prezidente PN.
“Rejimentu oras ne’e vise PN iha rua de’it tanba ne’e ami sei altera hodi aumenta tan ruaʺ, dehan nia iha PN, ohin.
Nia parte sei haruka proposta alterasaun ne’e ba meza hodi toma konsiderasaun. “Demokrasia iha mundu hatudu parlamentu hanesan iha viziñu Indonézia no Portugal forsa polítiku parlamentu iha konfigurasaun hodi hola parte iha meza parlamentuʺ, tenik.
Desizaun ne’e atu fó oportunidade ba partidu seluk hodi hola parte iha meza PN nu’udar òrgaun soberania daruak.
Oras ne’e, Jùlio Sarmento husi Partidu Demokràtiku no Antònio Verdial husi Kmanek Haburas Unidade Nasionàl Timor Oan (KHUNTO) asume kargu nu’udar vise prezidente ba lejislatura da-haat.
Entretantu, hosi bankada FRETILIN hili ona deputadu Francisco Miranda Branco ba xefe bankada no vise nain rua mak Josefa Pereira Soares no Fausto Freitas da Silva.
Jornalista: Agapito dos Santos
Editora: Rita Almeida
