DILI, (TATOLI) – Membru governu jestaun hanesan Primeiru Ministru, Rui Maria de Araújo, Ministru Koordenadór asuntu Ekonómiku no Ministru Agrikultura no Peska, Estanislau Aleixo da Silva ne’ebé tama lista deputadu hosi bankada Frente Revolusionariu Timor-Leste Indepéndente (FRETILIN) husu substituisaun ba kadeira iha Parlamentu Nasionál (PN).
Nune’e mós, Ministru Koordenadór ba asuntu Sosiál no Ministru Edukasaun, António da Conceição hosi lista bankada Partidu Demokrátiku husu subsituisaun permanente e hetan troka hosi Júlio Sarmento da Costa Meta Maluk ho lista kandidatu númeru ualu, agora dadaun hanesan Vise Prezidente PN eleitu.
Entretantu, subtituisaun hosi deputadu bankada FRETILIN ho tempu temporariu mak Rui Maria de Araújo husi loron 6 setembru ba deputada Noémia Sequeira ho lista kandidatu númeru 24 no Estanislau da Silva substitui husi loron 7 setembru ba deputadu Aurélio Freitas Ribeiro ho lista kandidatu númeru 25.
Deputadu sira ne’ebé husu substitusaun asume hela kargu nu’udar membru governu maibé iha ona faze governu jestaun hodi hein formasaun governu da-hituk tuir mai ne’ebé sei iha prosesu negosiasaun no tempu badak sei fó sai rezultadu.
Jornalista: Julia Chatarina
Editora: Rita Almeida
