DILI, (TATOLI) – Universidade Nasionál Timor Lorosa’e (UNTL) liuhusi Diresaun Nasionál ba Sentru hosi Konservasaun no Dezenvolvimentu Arte nomós Kultura (DNCCAC-sigla portugés) ohin, organiza kompetisaun koru no “Pop Singer” atu oinsá hametin, haburas talentu hodi tane aas valór kultura.
“Universidade Nasionál nu’udar sentru dezenvolvimentu poténsia hotu. Poténsia akadémika, kultura, artista no buat oioin”, hatete reitór universidade públika, Francisco Miguel Martins iha Kampus Sentrál UNTL, bainhira loke kompetisaun ne’e.
Ho poténsia sira ne’ebé mai husi Timor-Leste laran tomak, Jaco to’o Naimeco, Betano to’o Ataúro, hadi’a no dezenvolve talentu, nune’e sai fini di’ak ba nasaun. UNTL iha talentu barak, bainhira kuidadu didi’ak sei iha valór no di’ak ba futuru nasaun nian.
Reitór reforsa, tanba país livre bele halo buat hotu iha ukun-án nia laran, tuir na’i ulun sira katak presiza nafatin eroi foun la’ós eroi ho kilat hasoru inimigu.
Eroi foun mak oinsá luta hamosu buat foun ba prosesu dezenvolvimentu nasaun no povu. “Liuhusi ita-nia akadémika, talentu oioin ita bele hamosu buat barak ne’ebé serve ba nasaun no povu rai doben ida ne’e”, akresenta.
Kompetisaun koru no “Pop Singer” ne’e partisipa husi Fakuldade Medisina no Siénsia Saúde (FMCS), Fakuldade Enjenária, Siénsia no Teknolojia (FEST) ne’ebé antes ne’e sai nu’udar primeiro lugar ba atividade hanesan, Fakuldade Ekonomia no Jestaun (FEJ) no Fakuldade Filozofia (FF), Fakuldade Agrikultura (FA) maibé ohin la marka prezensa ho razaun ne’ebé la klaru.
Atividade ne’ebé seidauk partisipa husi Fakuldade Siénsia Sosiál (FSS) ne’e, konkorente kompetisaun aprezenta múzika tolu hanesan marsa UNTL ho títulu Hei Oan Timor nu’udar múzika obrigatóriu no múzika eskolla mak: “Eh Sandole” husi munisípiu Liquiça no “Kafé Tanan” husi Ermera.
Entretantu júri ba kompetisaun ne’e mak kompozitór, múziku, diretór Eskola Sekundária Katólika São Pedro, Díli nomós Fundadór Eskola Orkestra, Padre Aderito Vitór da Costa, kompozitór no múziku, Pedro Perreira nu’udar prezidente júri nomós artista timoroan koñesidu ida ho naran Jacob Martins.
Kritéria ba avalisaun kompetisaun talentu liliu múzika iha UNTL ne’e mak haree ba armonizasaun entre lian katak kanta la’o tuir malu ka lae, dinámika katak lian boot ka ki’ik liu husi konkorente sira. Tuir mai, haree ba intonasaun katak la’o tuir múzika ka lae no artikulasaun, liafuan sira ne’ebé fó sai tuir knananuk ka lae bainhira konkorente sira hananu.
Seluk mak autodomíniu katak aprezentasaun ka performa iha palku, espresaun katak konkorente sira esprea tuir sentidu múzika ka lae no ikus liu mak mak uniforme katak ko’alia kona-ba uniformidade ka hatais nian husi konkorente sira iha kompetisaun.
Atividade ne’e sei termina sesta (8/9) ho rezultadu finál husi ekipa júri sira.
Jornalista: Rafy Belo
Editora: Rita Almeida
