DILI, (TATOLI) – Banku Nasionál Komérsiu Timor-Leste (BNCTL-sigla iha portugés) halo mudansa ba sistema banku nian ne’ebé uluk uza sistema Micro Banker bainhira sei sai hanesan Institutu Mikro Finansa Timor-Leste ne’ebé aplika to’o 31 agostu 2017 tuir kapasidade mikro finansa nian, maibé daudaun muda ona ba Banku Komersiál mak utiliza fali sistema T24 hodi bele atende kliente ho di’ak liután no kompete ho banku sira seluk.
Diretór Ezekutivu BNCTL, Fausto Bernardino ba TATOLI iha Avenida Nicolau Lobato, Dili informa bainhira atu halo mudansa sempre iha prosesu ne’ebé han tempu no parte hotu tenke hadi’a aan hodi atende kliente ho di’ak liután hanesan daudaun akontese kliente sei antrian maibé ida ne’e mak realidade katak atu sai ba di’ak tenke liuhusi pasu pur pasu nune’e ba aban-bainrua atendimentu sai di’ak.
“Ita nafatin de’it ho sistema ida uluk entaun ita-nia atividade sei kloot hela de’it, ne’e mak ita tenke muda tanba ita Banku Komersiál entaun muda ita-nia sistema ne’e ba sistema komersiál nian”.
Fausto esplika tanba mudansa ba sistema foun maka data ne’ebé rai hela husi micro banker nian migrasi ba sistema foun T24 ne’ebé daudaun ne’e la’o ona para bele kompete ho banku sira seluk ho atividade ne’ebé iha, BNCTL bele la’o.
“Maibé buat ne’e la’ós fasil para ita atu dehan diretamente atu sai hanesan ho banku sira seluk, karik ita kompara ho banku hirak ne’ebé agora daudaun iha ne’e, hanesan BRI, BNU, sira kleur ona agora ita foin mak hakat, pasu pur pasu ita hadi’a aan daudaun atubele kompete ho sira”.
Tanba ne’e mak hadi’a sistema ba T24 no hein katak bá oin bele halo atendimentu iha BNCTL nian sai di’ak liután.
“Agora daudaun muda ne’e, BNCTL halo prosesu hahú dezde tinan 2015 mak prosesu la’o no data ne’e bele muda mai iha sitema foun ne’e, ne’ebé agora ita aplika ona sistema foun, hanesan ita haree kuandu muda husi ida tuan ba foun ne’e komplikadu uitoan, ne’ebé dadus sira ne’ebé tama iha ne’ebá sei sinkroniza hotu tiha mak atendimentu ne’e bele sai di’ak”.
Sistema foun komersiál ne’e tenke halo atividade barak oinsá mak serví kliente ho di’ak mak hanesan daudaun ne’e BNCTL uza ona ATM (Automated Teller Machine) ne’ebé kliente sira uza ona, Top Up mós la’o ona no lakleur tan sei uza POS ka kartaun débitu.
“Kuandu bá kompras ruma karik lapresiza lori osan, uza de’it debit card ne’e bele bá kompras iha loja sira ne’ebé hala’o kompras depois lakleur tan implenta SMS Banking, agora prosesu hela kuandu ema halo tranzasaun iha nia konta bankária bele alerta ba nia para nia hatene dehan osan tama ka ema foti osan ruma karik nia bele hatene. Ita espera katak tarde liu tinan oin bele la’o ona no sei iha Internet Banking, Mobile Banking katak kuandu ida ne’e la’o hotu ita lapresiza mai tan banku, ita bele tuur de’it iha uma kuandu ita halo tranzasasaun ba negósiu ruma karik ita bele halo iha uma de’it ho laptop ka komputadór através internét”.
Sitema T24 ne’e kuaze banku 300 resin iha mundu mak utiliza ona sistema foun ne’e no nia vantajen husi sistema ne’e mak aplika hanesan banku komersiál ne’ebé bele asesu luan liután.
Jornalista: Maria Auxiliadora
Editora: Rita Almeida
