DILI, (TATOLI) – Mesmu retira hosi koligasaun maibé bankada Kmanek Haburas Unidade Nasionál Timor Oan (KHUNTO) iha Parlamentu Nasionál sei defende asuntu importante sira ne’ebé liga ba interese Nasaun.
“Bankada KHUNTO sei nakloke hodi koopera ho bankada parlamentár hotu iha ámbitu ida unidu no repeitu malu hodi defende asuntu importante sira mak liga ho interese nasionál nian”, deklara xefe bankada KHUNTO, Armanda Berta dos Santos iha ámbitu abertura lejislatura da-haat PN, ohin.
Iha deklarasaun polítika, Armanda haktuir, KHUNTO sai hosi koligasaun tanba la konsege hetan no intende didiak atu ezerse kooperasaun ida atu garante futuru estabilidade governu.
Hatutan tan, maske kiik no foun iha parte polítika nasionál maibé KHUNTO iha vontade boot tebes hodi promove, tane aas, no respeitu malu entre forsa polítiku sira. KHUNTO fiar katak bele iha koligasaun ne’ebé dura ba tempu naruk bainhira promove hahalok respeitu malu.
“Maske la’ós desizaun ne’ebé fasil maibé KHUNTO fiar katak desizaun ne’e mak di’ak liu ba ezisténsia polítika partidu KHUNTO ba futuru”, katak.
Ezame retira hodi koligasaun hanesan momentu importante ba KHUNTO nia identidade polítiku tanba respeitu malu mak valór fundamentál ida no lalaok polítiku hodi garante forma kooperasaun polítiku saida de’it.
Armanda hatutan iha ninia deklarasaun politika, katak, konfiansa iha polítika labele sosa ho osan tanba konfiansa nu’udar fatór importante hodi garante kooperasaun entre forsa polítiku.
Maske nune’e liuhosi bankada parlamentár, KHUNTO kumpri motivu atu kontribui nu’udar opozisaun ne’ebé adekuadu iha uma fukun.
Jornalista: Julia Chatarina
Editora: Rita Almeida
