DILI, (TATOLI) – Ministru ba Prezidénsia Konsellu Ministru nian (PCM-sigla portugés), Adriano do Nascimento hatete knaar ne’ebé halo iha tempu badak mak sei halo preparasaun jestaun ba reuniaun Konsellu Ministru (KM) nian nomós haree servisu tékniku balun.
“Porque ami seidauk ko’alia kona-ba programa, tantu programa polítika tanba ida ne’e mak sei la’o nafatin, kestaun téknika jestaun ninian, nune’e iha tempu badak sei halo reuniaun Konsellu Ministru, parese aban atu halo Konsellu Ministru ba dahuluk hodi nune’e bele diskute ona sobre kestaun téknika oinsá mak atu haree programa bá oin”, Adriano informa ba jornalista sira iha Palásiu Governu, ohin.
Tanba ne’e, tempu ida agora importante mós ba ministériu ida ne’ebé nia papél hanesan PCM nian, klaru sei haree liuliu kona-ba jestaun no konsolidasaun ba imajen Governu Konstitusionál Dahituk nian liuhusi portál Governu atu haklaken sai ba públiku katak Governu ida ne’e hahú daudaun ona ninia servisu.
“Ohin Primeiru-Ministru mós hala’o ona serbisu, ha’u iha ne’e hala’o serbisu, enkontru hamutuk ho funsionáriu sira iha diresaun sira ne’e hotu”.
Adriano hatutan enkontru KM nian ne’ebé sei hala’o aban ne’e partisipa husi membru Governu Dahituk nian ne’ebé foin simu tomada pose iha loron 15 setembru 2017.
Enkuantu sobre subsituisaun kargu Ministru atuál nian iha Parlamentu Nasionál tanba antes ne’e asume nu’udar deputadu, Adriano hatete halo ona substituisaun no asina dezde semana kotuk no agora depende ba partidu mak halo subsitituisaun tuir lista ne’ebé iha.
Jornalista: Maria Auxiliadora
Editora: Rita Almeida
