DILI, (TATOLI) – Ministru Administrasaun Estatál (MAE), Valentim Ximenes hateten ema ne’ebé iha kompeténsia linguístika di’ak bele garante prestasaun servisu públiku.
“Ne’e ordem konsititusionál imperativu (determina), hakarak sai profesionál no tékniku di’ak iha Timor-Leste rekere kapasitasaun atu bele iha kompeténsia linguístika di’ak, prestasaun servisu públiku no garante funsionamentu ba atendimentu públiku iha domíniu eh área ida-idak nian”, salienta Ministru Valentim Ximenes iha ámbitu enkontru ho diretór no funsionariu órgaun eleitorál (STAE) iha Kaikoli, ohin.
Nia husu ba Sekretariadu Tékniku Administrasaun Eleitorál (STAE) atu halo planu kona-ba kapasitasaun rekursu umanu iha dalen portugés, tanba ministériu iha programa uniforme kona-ba kursu báziku iha ministériu laran durante fulan neen.
“Ha’u sei ministru, sei la permite ema atu ba tuir formasaun iha Indonézia tanba sistema governu lahanesan, piór liu mak ita dehan sistema direitu, nia hun la’os iha Indonézia maibé iha Portugal”, afirma nia.
Moderniza administrasaun públika tenke ba tuir formasaun lian portugés, enkuantu iha Indonézia sei la autoriza maibé kursu jestaun, lideransa no tékniku nian bele ba Indonézia hanesan nasaun viziñu..
Formasaun ne’e, sé mak iha kapasidade atu komprende, lé, hakerek konversa ho di’ak, sei iha programa ida hodi haruka ba Universidade Coimbra-Portugal atu tuir kursu dalen portugés ho fulan ida tomak ekivalente ba semester ida.
Ho objetivu kursu ne’e atu eleva di’ak liu tan kapasidade no kompeténsia linguístika iha dalen portugés.
Hotu tiha ba tama iha faze avansada ho lian portugés avansada bele estuda iha Lisboa, Braga no Coimbra tanba malae sira gosta oferese ho kursu gratuitu ba Timoroan.
Enkuantu, STAE nia servisu la’os iha Timor-Leste de’it maibé iha Estadu membru komunidade nasaun ne’ebé ko’alia lian portugés (CPLP-sigla portugés) tanba ne’e, funsionáriu sira órgaun eleitorál tenke aprende dalen portugés maibé kuandu lahatene keta hanoin atu ba.
“Sé mak la hatene portugés lalika gasta orsamentu atu ba nasaun CPLP sira, imi lalika hirus, sé hirus mós ha’u la konsidera nafatin”, afirma tan.
Jornalista: Zezito Silva
Editora: Rita Almeida
