DILI, (TATOLI) – Milionária Isabel dos Santos, oan feto-boot hosi eis-prezidente Angola, José Eduardo Santos iha interese halo investimentu iha Timor-Leste.
“Informalmente, hasoru malu ho antigu prezidente Angola nia oan feto iha interese hodi mai investe mós iha Timor-Leste”, informa Ministru Negósiu Estranjeiru no Kooperasaun, Aurelio Cristovão Guterres ba ajénsia Tatoli hafoin fila husi Luanda-Angola bainhira reprezenta estadu partisipa tomada posse prezidente Angola eleitu foun, João Lourenço, iha aeroportu Nicolau Lobato Dili, sábadu (30/9).
Ministru Aurelio mós informa nia parte iha oportunidade hasoru malu ho komunidade timoroan sira ne’ebé hela iha Angola liliu sira ne’ebé iha interese hakarak atu investe iha Timor-Leste.
“Sira ne’ebé durante ne’e hanesan emprezáriu, sira mós hakarak halo planu atu mai investe”, haktuir.
Aurelio Cristovão Guterres informa nia dezlokasaun ba Angola ho objetivu prinsipál mak reprezenta estadu Timor-Leste hodi ba partisipa prezidente foun Angola nian.
Alende ne’e hasoru prezidente foun hodi hato’o dezeju Prezidente Repúblika Timor-Leste, Francisco Guterres Lú Olo nomós estadu no povu ba prezidente foun Angola nian, nune’e hodi bele susesu bainhira hala’o kna’ar durante tinan lima mai oin.
“Enkontru ho ministru negósiu estranjeiru Angola nian (Georges Chicoti), atu reitera fali Timor-Leste ninia polítika liliu serbisu, koopera di’ak liutan ho Angola iha nível bilaterál nomós nível rejionál nian hanesan CPLP”, haktuir.
Nia informa tan, iha mós posibilidade husi Ministériu Negósiu no Kooperasaun Angola nian atu estabelese sira-nia embaixada iha Dili, Timor-Leste.
Alende ida ne’e, iha mós enkontru ho Ministru Negósiu Estranjeiru, Portugal nian, Augostu Santos Silva hodi reforsa kooperasaun ne’ebé durante ne’e la’o nomós apoiu ne’ebé mak Timor-Leste hetan hosi Portugal iha setór edukasaun, setór judisiál nomós setór sira seluk.
“Husi prezidente repúblika, Prezidente Repúblika Angola nian hato’o ninia komprimentu nomós dezeju susesu ba ita-nia prezidente da repúblika durante nia mandatu tinan lima nia laran, enkontru sira formál nian mak ne’e”, informa eis-reitór Universidade Nasionál Timor Lorosa’e (UNTL).
Nasaun Angola la iha impresaun maibé dezeja susesu ba formasaun sétimu governu Timor-Leste nian ne’ebé lidera husi Primeiru Ministru, Marí Alkatiri.
“Sira dezeja atu ita-nia governu ne’e susesu atu bele halo dezenvolvimentu ba ita-nia rain, servi ita-nia povu di’ak liutan”, konklui governante ne’e.
Entretantu, Isabel Santos, eis-xefe estadu Angola, José Eduardo Santos nia oan feto ne’e, tuir revista Finansial Amerika Forbes nu’udar milionária dahuluk kontinente Áfrika.
Oan feto-boot eis-prezidente ne’e, nia investimentu iha Angola, Portugal no seluk tan iha área bankária, telekomunikasaun no otelária.
Partisipasaun ne’ebé kria husi milionária afrikana iha dékada ikus, entre 1993, 1994 no 1995 ne’e mak Unitel International Holdings,Santoro Finance, Esperanza, Condis no Terra Peregrin.
Jornalista: Rafy Belo
Editora: Rita Almeida
