DILI, (TATOLI) – Organizasaun Akadémika, Klibur Estudante Fatuberliu (KEFA), Munisípiu Maun-Fahe organiza formasaun lideransa no jestaun ho intensaun atu kapasita no hakle’an liutan estudante no foinsa’e sira nia hanoin no koñesimentu kona-ba lideransa no jestaun.
“Ha’u hanoin formasaun ne’e importante tebes no presiza duni fó ba estudante no joventude sira atu hakle’an liutan esperiénsia no hanoin ne´ebé iha ona”, informa partisipante formasaun, Miguel da Silva Hornay ba ajénsia Tatoli iha salaun Katedrál Dili, domingu (1/10).
Formasaun ne’e hodi kompleta liutan siénsia no matéria sira ne’ebé aprende iha universidade nomós edukasaun naun-formál sira. “Formasaun ne’e importante hodi bele hamosu lider foun iha organizasaun KEFA”, reforsa.
Lisensiadu polítika públika Universidade Nasionál Timor Lorosa’e (UNTL) ne’e espera, formasaun ne’e bele sai hanesan bukae hodi prepara mós lider foinsa’e ba futuru.
Fundadór ida ba KEFA, Miguel da Silva mós informa, kapasitasaun ne’e hala’o bazea ba planu anuál organizasaun nian no nakloke mós ba estudante no foinsa’e, sekundáriu no universitáriu sira husi munisípiu 12 inklui RAAEOA (Rejiaun Administrativa Autonomia Ekonómiku Oe-cuse, Ambeno) iha área oioin ho formadór husi organizasaun keta-ketak.
“Fulan ida realiza dala rua, semana kotuk ami realiza formasaun kona-ba peskiza no advokásia”, subliña ativista nomós poeta, Miguel da Silva.
Formasaun lideransa no jestaun fasilita husi Alexandre Perreira, husi Organizasaun Haberan.
KEFA harii iha loron 18 maiu 2010 ho lema: “La mesa-mesak sirit ai-tehen, hodi malu ho malu sirit ai-tehen”, katak sempre hamutuk.
Organizasaun ne’e funda husi universitáriu nomós ativista sira hanesan Euclides Torezão, Miguel da Silva Hornay, Imildo Ximenes, Luís Fária, Francisca Amaral no Aurelia Alves. Oras ne’e KEFA prezide husi akadémiku, Manuel Mesquita.
Konselleiru mak doutór Vicente Faria Soares, padre José António da Costa, padre Abbah Laba Lazar no Tomas Alves.
Padrueiru mak santu Francisco de Assis no éroi saudozu, ativista revolusionáriu, poeta, eskritór no kompozitór, Francisco Borja da Costa.
“Membru la’ós universitáriu de’it maibé joventude ne’ebé remata eskola sekundáriu, joventude ne’ebé tuir kursu, organizasaun ne’e haku’ak ema hotu”, relata.
Jornalista: Rafy Belo
Editora: Rita Almeida
