DILI, (TATOLI) – Diretór Jerál Autoridade Aduaneira, José António Fátima Abílio hatete Diresaun Jerál Alfándega ne’ebé transforma ona ba Autoridade Aduaneira iha ona podér foti desizaun balun no la presiza to’o Konsellu Ministru no ministru tutela tanba lei fó ona podér.
Podér seluk mak serbisu operasionál nian ne’ebé mak iha servisu sentrál no desentraliza tanba iha nivel desentralizadu iha ona kompeténsia atubele foti mós desizaun balun relasiona ho servisu operasionál ne’ebé tenke foti.
“Sira lapresiza mai iha sentrál entaun signifika katak ita delega ona podér balun, ita funsiona sira ona, aleinde burokrasia”, hatete José iha edifísiu Ministériu Finansa tuan, ohin.
José hatutan, estrutura Autoridade Aduaneira nian seidauk prenxe hotu maibé área xave sira ema iha hotu ona no liuhusi mudansa Diresaun Jerál Alfándega ba autoridade ne’e tenke halo buat barak devidu komisaun instaladora presiza prepara planu estratéjiku, orsamentu no kontinuidade husi tranferénsia ne’e.
“Komisaun instaladora mós iha ona planu atu halo formasaun ba jestór sira, esplika kona-ba estrutura foun ne’e depois esplika mós kona-ba kódigu foun autoridade nian ba jestór sira iha nivel sentrál hafoin ba jestór desentralizadu sira iha munisípu no fronteira sira”.
Sobre tranzisaun husi diresaun ba autoridade, funsaun autoridade nian ladook husi diresaun jerál halo maibé diferensa uitoan mak autoridade iha funsaun boot no luan liután tanba iha kompeténsia barak.
Nune’e iha prosesu tranzisaun ne’e presiza iha ajustamentu no komisaun instaladora tenke prepara di’ak komu nian sai hanesan semí autónoma signifika iha orsamentu, halo planu no aprovizionamentu rasik ne’ebé ladepende ona hanesan diresaun nian hodi ba ministériu.
“Entermu rekursu kona-ba jestaun finansa públika nian tenke halo rekrutamentu no iha prestasaun serbisu katak ho serví desentralizasaun ne’e servisu alfándega nia nesesidade bele responde lalais ona tanba laliu burokrasi ne’ebé naruk, ita habadak entaun nesesidade autoridade nian bele responde imediata”.
Tranzisaun Diresaun Jerál Alfándega ba Autoridade Aduaneira foun no Diresaun Jerál Impostu ba Autoridade Tributária legalmente tama iha vigor no hahú halo funsaun iha 30 setembru 2017 no 1 outubru 2017 respetivamente.
Tuir komunikadu ne’ebé TATOLI asesu, Ministru Planu no Finansa, Rui Augusto Gomes hatete implementasaun autoridade ne’e marka tan pasu importante iha Programa Reforma Fiskál hodi moderniza, harii integridade, transparénsia no profisionalizmu iha Administrasaun Aduaneira no Tributária.
“Ida ne’e momentu importante ba nasaun, tanba autoridade foun rua ne’e sei hala’o papél krítiku iha Timor-Leste atu konsege nia poténsia tomak iha termu kresimentu, diversifikasaun no haforsa investimentu iha ekonomia”, hatutan.
Nia espresa: “Ha’u kontente katak autoridade foun rua ne’e bainhira halo ona funsaun kompletu sei fó prestasaun servisu di’ak liu hodi aumenta atendimentu di’ak ba kontribuinte, importadór no esportadór sira. Reseita ne’e, Governu sei iha rekursu hodi investe iha nasaun atu asegura moris di’ak sidadaun hotu nian”.
Jornalista: Maria Auxiliadora
Editora: Rita Almeida
