DILI, (TATOLI) – Deputadu sira iha Parlamentu Nasionál, ohin liuhosi plenária husu ba governu atu normaliza folin foos no nesesidade bázika ne’ebe sa’e iha merkadu.
Deputadu hosi bankada Partidu Libertasaun Populár (PLP), Merício Juvenal, hateten problema ne’e presiza rezolve iha tempu badak, nune’e nia husu ministériu relevante atu halo intervensaun ba merkadu para bele normaliza fali presu.
“Se hasai folin ne’e ho intensaun negativu no intensaun atu foti oportunidade, ida ne’e mós bele halo komunikasaun ho ita nia negosiante no setór provadu sira hodi kolabora atu normaliza. Tanba bainhira ida ne’e kontinua, la’ós setór privadu, la’ós pengambil kebijakan (ema ne’ebé halo desizaun) mak afetadu maibé populasaun sira mak kapasidade kompras limitadu”, tenik iha intervensaun plenária.
Iha fatin hanesan deputadu husi bankada Frente Revolusionaria Timor-Leste Independente (FRETILIN), Aurélio Freitas iha ninian intervensaun hateten presu sasan sa’e hanesan konsekuénsia prosesu polítika ne’ebé mak la’o dadauk, nune’e labele fó sala ba ministériu relevante.
Hodi haktuir, família ida bain-bain hola foos karon ida ka rua derepente hola foos karon 10, nune’e stok iha loja laiha no sasan folin sa’e tanba sira tauk ho situasaun polítika ne’ebé agora dadauk la’o.
“Ne’e prosesu normál iha merkadu, emprezáriu sira observa no halo espekulasaun bainhira demanda merkadu barak liu entaun sira hasae folin tanba stok merkadu laiha ona, ne’e lójika ekonomia hanesan ne’e”, katak.
Nune’e mós husi bankada PLP, deputadu Abel Pires, hateten ema balun aproveita situasaun hodi hasa’e folin nesesidade bázika hanesan foos, mina no seluk tan, hatudu katak hahalok hanesan ne’e laiha responsabilidade tanba aproveita situasaun.
Hodi apela ba governu liu-liu ministériu relevante atu halo operasaun ba merkadu sira hodi hatudu katak situasaun di’ak hela.
Deputadu bankada FRETILIN, Antoninho Bianco, dehan istória sira dalaruma la mesak mosu de’it tanba líder no polítika sira mak halo istória no ema sira mai lé istória, ne’e duni istória sira halo afeta hotu folin sa’e.
“Polítika mak halo istória, iha ita nia moris ne’e istória labele mosu de’it. Tanba sa mak ita lakohi hakbesik malu, rona malu no halo tuir ba malu, ida ne’e mak ita nia problema, sei ita haree ba interese povu no rai ne’e ninian, la’ós interese poder, buat hirak ne’e sei la akontesse”, halo komparasaun.
Jornalista: Julia Chatarina
Editora: Rita Almeida
