DILI, (TATOLI) – Prezidente Repúblika, Francisco Guterres Lú Olo no Prezidente Parlamentu Nasionál, Aniceto Guterres, ohin halo diskusaun kona-ba situasaun polítika ne’ebé akontese iha uma fukun relasiona ho programa governu dahitu ne’ebé hetan rejeisaun husi deputadu sira.
ʺAmi ko’alia kona-ba funsionamentu parlamentu no situasaun polítika”, dehan nia ba jornalista sira iha Palásiu Prezidensiál Bairo-Pite.
Konstituisaun artigu 108 (governu nian programa) alinea 1) bainhira governu nomiadu ona, nia sei halo nia programa hodi hatudu nia objetivu no kna’ar oioin ne’ebé nia hakarak hala’o, medida ne’ebé atu uza no orientasaun polítika prinsipál sira-ne’ebé nia hakarak tuir iha domíniu atividade governu nian.
Alinea 2) Primeiru-Ministru hato’o programa governu nian ne’ebé Konsellu-Ministru aprova ona ba Parlamentu Nasionál atu apresia iha prazu la liu loron tolunulu, sura husi loron ne’ebé Governu hahú nia funsaun.
“Ita hein governu bainhira maka aprejenta fila fali ba parlamentuʺ, tenik tan.
Sorumutu líder órgaun soberania rua ne’e preokupa mós orsamentu jerál estadu no orsamentu retifikativu hodi garante nafatin funsionamentu makina estadu.
Tanba ne’e, Xefe Estadu hateten, sei hola inisiativa atu halo diálogu ho líder partidu Kongresu Nasionál Rekonstrusaun Timor (CNRT-sigla portugés), Xanana Gusmão, Partidu Libertasaun Populár (PLP), Taur Matan Ruak no Kmanek Haburas Unidade Nasionál Timor Oan (KHUNTO), ho Primeiru-Ministru hodi haree kona-ba situasaun polítika ne’ebé akontese iha rai laran.
ʺParese Prezidente-Repúblika hasai ona surat ruma ba Prezidente Partidu CNRT, PLP, KHUNTO ho PDʺ, realsa.
Jornalista: Agapito dos Santos
Editora: Rita Almeida
