DILI, (TATOLI) – Prezidente Repúblika (PR), Francisco Guterres Lú Olo ho Organizasaun RENETIL (Rezisténsia Nasionál Estudante Timor-Leste) hasoru malu hodi diskute situasaun polítika iha rai laran.
Portavoz RENETIL, José Luis Oliveira, hateten sira nian parte preokupa ho situasaun polítika atuál.
ʺOhin ami mai diskute ho Prezidente Repúblika nomos troka idea balun kona-ba konstitusionalidade, nune’e mós medida balun, polítikamente prezidente foti medida tuir konstituisaun, fó dalan hodi hakat liutan situasaun ida inserteza governasaun dahituʺ, dehan nia ba jornalista sira iha Palásiu Prezidensiál Nicolau Lobato Bairo Pite, ohin.
Nia informa, diskusaun ne’e atu garante funsionamentu makina estadu nomos situasaun polítika ida di’ak ba povu atu moris hakmatek.
RENETIL hamrik iha loron 20 tinan 1988 iha Denpasar Bali, Indonézia, funda husi estudante universitáriu Timoroan nain 10 lidera husi saudozu Fernando Lasama de Araújo Lasama hanesan Sekretáriu Jerál.
Jornalista: Agapito dos Santos
Editora: Rita Almeida
