DILI, (TATOLI) – Ministru Administrasaun Estatál, Valentim Ximenes, informa ba jornalista sira iha Palásiu Governu, segunda (20/11) katak komemorasaun 28 novembru tinan ne’e konsentradu iha munisípiu Kovalima, serimónia hanesan sei hala’o iha kada munisípiu.
“Ita-nia serimónia konsentradu iha Suai maibé munisípiu sira hotu mós iha ninia selebrasaun rasik. Orsamentu ba sira ketak i kada membru governu ida enviadu atu ba sai inspetór jerál ba isar bandeira, atu lee diskursu prezidente repúblika nian iha munisípiu hotu”, informa.
Valentim hatutan munsípiu sira mós iha ninia loron rasik, biban rasik maibé ba estadu nian tomak konsentra iha Suai tanba ne’e planu ba tinan-tinan rotativu i halo ida ne’e ba bebeik.
Kona-ba orsamentu, sei relata loloos bainhira komemorasaun 28 novembru realiza.
Bainaka espesiál ne’ebé sei marka nina partisipasaun seidauk hatene klaru, bele hatene loloos entre loron 25 no 26 semana ne’e.
“Bainaka husi nasaun sira seluk mós iha, ha’u seidauk hatene loloos na’in hira mak mai”, informa.
Entretantu, Administradór Munisípiu Kovalima, Fernando Nogueira Nahak, informa preparasaun ba komemorasaun prontu ona, fatin isar bandeira no ba bainaka sira prepara ona, saneamentu mós preparadu.
“Hein tan komisaun sira husi nasionál mai atu bele dezenvolve di’ak liutan”, katak nia antes ne’e.
Komemorasaun loron istóriku harame ho atividade desportiva no atividade tradisionál sira oi-oin.
Preparasaun no fasilidade sei reforsa husi autoridade nasionál, Diresaun Nasionál Bee no Saneamentu, liu-liu disponibiliza tan kareta tanki tolu no casa de banho movel atu bele halo kobertura.
Jornalista: Rafy Belo
Editora: Rita Almeida
