KOVALIMA (TATOLI) –Komunidade Kovalima, ohin (27/11), iha Munisípiu Kovalima realiza diálogu ho Prezidente da Repúblika, Francisco Guterres Lu Olo hodi hato’o preokupasaun komunidade no autoridade lokál ba Prezidente da Repúblika.
Administradór Munisípiu Kovalima, Afonso Nogueira Nahak esplika, objetivu sorumutu ne’e mak oinsá komunidade eh autoridade lokál sira diálogu direita ho Prezidente Repúblika (PR) atu bele hato’o preokupasaun.
“Momentu ne’e importante tebes tanba PR, Lu-Olo bele enkoraja no fó solusaun liuhosi kompeténsia hodi kanaliza ba instituisaun governu atu bele hatán,” Afonso Nogeira Nahak realsa iha abertura programa diálogu no iha ámbitu aprezentasaun relatóriu ba preparasaun Selebrasaun 28 Novembru.
Nia dehan, Xefe Estadu, Lu Olo enkoraja no inspira sira hodi kontinua serve povu ida ne’e ho di’ak no susesu iha Munisípiu Kovalima.
Iha diálogu ne’e, Administradór informa mós ba Xefe Estadu kona ba situasaun jerál iha Munisípiu Kovalima.
“Situasaun la’o di’ak no kontroladu tanba hetan apoiu no kooperasaun di’ak entre povu sira ho Polisia Nasionál Timor-Leste (PNTL) ho Falintíl Forsa Defeza Timor-Leste (F-FDTL),” Nogeira haktuir.
Kona-bá preparasaun selebrasaun aniversáriu 28 Novembru nian, tuir administradór, durante governu lokál koopera ho governu sentrál hadi’a estrada iha vila laran eh Postu Administrativu Suai no oras ne’e tama ona iha faze finalizasaun no sei finaliza iha Tinan oin mai.
Iha parte seluk, atividade desportu ne’ebé mak sei harame selebrasaun loron proklamasaun unilateral (aban) mak hanesan, atividade desportu ho modalidade tolu; Foot Ball, Voly Ball no desportu tradisionál.
“Manan Nain ba atividade Desportu hirak ne’e Prémiu sei entrega hosi Prezidente Repúblika, inklui Ministru sira,” Nogeira dehan tan.
Aleinde ida ne’e mós Prezidente nia ajenda iha Kovalima sei halo mós lansamentu ba Plaka Toponímia iha fatin Avenida Antonio Mendonça.
(Jornalista : Zezito Silva)
(Editór : Manuel Pinto)
