iklan

DILI, MUNISÍPIU

Partisipasaun Ema Ho Defisiénsia Importante Ba Dezenvolvimentu

Partisipasaun Ema Ho Defisiénsia Importante Ba Dezenvolvimentu

Espoza Prezidente Repúblika, Cidalia Lopes hakuak feto maluk defisiente. Foto Antonio Goncalves

DILI, (TATOLI) – Partisipasaun ema ho defisiénsia importante ba dezenvolvimentu nasionál tanba sira ho defiénsia fízika de’it la’os defisiénsia iha hanoin.

“Ha’u fiar metin katak ema ho defisiénsia fízika de’it maibé sira hala’o atividade monitorizasaun  no seluk tan, signifika sira iha hanoin atu partisipa iha prosesu dezenvolvimentu nasionál”, hateten Espoza Prezidente Repúblika, Cidalia Lopes, bainhira lansa relatóriu ema ho defisiénsia ne’ebé durante ne’e partisipa iha prosesu eleisaun parlamentár iha Ótel Timor, kinta, (30/11).

Cidalia hatete maluk defisiénsia sira iha kreatividade oioin hanesan produz produtu artezenatu ho kualidade ne’ebé faan iha Timor-Plaza no fatin seluk, rezultadu hatudu bele promove ona kreatividade iha nível lokál, nasionál, rejionál no internasionál.

Nune’e mós partisipasaun iha área desportu fó rezultadu di’ak iha nivé nasionál no internasionál inklui muzika hanesan sira hananu no toka di’ak tebes, enkuantu sira nia partisipasaun iha vida polítika di’ak tebes tanba ezemplu mak Gaspar, bainhira partisipa iha debate polítika ne’ebé organiza hosi Komisaun Nasionál ba Eleisaun (CNE-sigla portugés).

Hirak ne’e hatudu katak sira fízikamente defisiénsia maibé sira nia hanoin no kreatividade la mate.

Biar ho defisiénsia maibé sira iha kualidade koñesimentu propria hodi fó kontribuisaun tanba sira iha korajen, vontade no esforsu tomak katak ema ho defisiénsia mós bele.

Estadu rekoñese hodi promove no proteze sidadaun ne’ebé ho defisiénsia hanesan mós sidadaun normál liuhosi hatur sira nia direitu no dever ema ho defisiénsia nian iha artigu 21 konstituisaun RDTL.

Iha ona progresu pozitivu balun ne’ebé governu halo hanesan adopta polítika nasionál inkluzaun no promósaun direitu ema ho defisiénsia nian. Governu mós esforsu hodi prepara esbosu Planu Assaun Nasionál ba ema ho defisiénsia.

Progresu balun ema ho defisiénsia sira mós hetan tulun hosi governu, nune’e doadór sira fasilita kursu, rehabilitasaun no konsensializasaun ba komunidade sira, maluk defisiénsia sira mós hetan subsidiu hosi Ministériu Solidariedade Sosiál (MSS) hodi bele tulun nesesidade moris nian.

Entretantu, ema ho defisiénsia sira presiza iha atensaun, domin no apoiu hodi sira bele hatutan sira nia moris iha sosiedade.

Nune’e mós ema defisiénsia susar tebes atu asesu ba tribunál, esperiénsia hatudu mós katak ema defisiénsia sira asesu ba tribunál seidauk hetan fasilidade sufisiente hanesan tradutór hodi tulun sira iha prosesu tribunál.

Sira merese hetan atensaun no apoiu hosi ema hotu, liliu Estadu, fiar katak governu kontinua tau prioridade ba asuntu ema ho defisiénsia sira.

Jornalista: Zezito Silva

Editora: Rita Almeida

iklan
iklan

Leave a Reply

iklan
error: Content is protected !!