DILI, (TATOLI) – Transaporte aereo husi Indonézia, Transnusa Aviation Mandiri ka naran badak Transnusa ho númeru 72-600, ohin halo aterajen iha aeroportu internasionál Nicolau Lobato Komoro ho transporta pasajeiru husi Kupan, Indonézia mai Dili, hodi ofisializa movimentasaun ka operasaun.
Aviaun ne’e to’o iha Dili tuku 11:25, simu ho water spray (tiru bee) no simu kedas bensaun husi Nai lulik hafoin aterajen.
“Ha’u sente aviaun ne’e di’ak, dalabarak sa’e ona aviaun, aviaun ida ohin mai ne’e, aviaun ida di’ak”, haktuir pasajériu, konsuladu Timor-Leste iha Kupan, Francisco Jerónimo, ba jornalista sira iha aeroportu Komoro, ohin.
Nia dehan atendimentu aeromosa sira nian iha aviaun komersiál ne’e mós di’ak hanesan atendimentu iha aeromosa aviaun komersiál sira seluk. Kona-ba durasaun husi Kupan mai Dili, minutu 45.
Diretór Air Timor, Francisco de Oliveira, hatete aviaun komersiál ne’e sei para de’it iha Kupan tanba aeroportu Nicolau Lobato seidauk iha safety ka salvasaun mak halo operasaun mai Dili, karik iha Timor-Leste iha ona mak sei para mós iha ne’e.
“Parafuzu ida mak la iha mós ita la hatene, atu troka mós ita la hatene. Rekursu umanu mak ita sei fraku”, katak.
Kona-ba billete entre dolár 45 no 50. Presu billete laduun problema tanba kompetisaun, presu sei tuun, bainhira hasa’e ema la sa’e, depois pasajeiru mós konta ona maizmenus iha hira mak atu bele sa’e aviaun, esplika.
Entretantu, Transnusa Aviation Mandiri hahú halo lansamentu iha Agostu 2015. Aviaun ne’e iha kadeira 70 ho konfigurasaun klase ekonomia, sei halo operasaun semana ida dala tolu iha segunda, kuarta no sesta ho oráriu hanesan 8B118 KOE-DIL 11:30 LT/13:30 lt NO 8B119 DIL-KOE 14:00 LT/ 14:00 LT.
Aviaun foun ida ne’e ho idade menus husi tinan tolu.
Jornalista: Rafy Belo
Editora: Rita Almeida
