DILI, (TATOLI) – Liga Futeból Amadora (LFA) Timor-Leste ba époka datoluk nian sei hahú iha 22 Fevereiru 2018.
Desizaun ne’e fó sai hosi ezekutivu LFA kompostu hosi Prezidente LFA, Nilton Gusmão, Sekretáriu Ezekutivu, Sérgio da Costa Hornai, no sira seluk liuhosi reuniaun alargada ne’ebé hala’o iha D’City Hotel Vila Verde, semana kotuk.
“Informa ba públiku katak liuhosi reniaun ne’ebé maka halao iha D’City Hotel, LFA deside ona katak sei hala’o hikas jogu Liga Futeból Amadora époka 2018 iha Fevereiru tuir kalendáriu tentativa ne’ebé maka prepara ona hosi Diresaun Kompetisaun LFA”, haktuir Diretór Finansa LFA, Adolmando Amaral.
Tanba ne’e, Adolmando hatutan, hahú 20 to’o 30 Dezembru, ekipa hosi LFA sei ba hala’o reuniaun ho klube hamutuk 20 ne’ebé maka iha liuhusi vizita ida-idak nia sede atu bele ko’alia hodi rona informasaun hosi klube sira antes hahú époka tinan oin.
Iha 31 Dezembru 2017 to’o 31 Janeiru 2018, LFA mós sei loke hikas Janela Transferénsia jogadór ba klube sira no kampu ne’ebé maka sei utiliza ba jogu ida ne’e maka Estádiu Munisipál Dili, Baukau no Maliana.
Jornalista: Xisto Freitas
Editora: Rita Almeida
