DILI, (TATOLI) – Diretór Jerál Autoridade Aduaneira (AA), José António Fátima Abílio, hatete durante períodu janeiru to’o 18 dezembru 2017, rekolla ona reseita ba kofre Estadu hamutuk millaun U$70.51.
Reseita ne’ebé parte autoridade hetan mai husi taxa importasaun ho totál millaun U$13,861,184.71, taxa seletivu hamutuk millaun U$40,783,050.40.
“Ita iha taxa sobre venda iha millaun 15,636,653.36, depois penalidade ita iha mil 172,843.14 no fee sira ne’e ita iha mil 59,518.00. Totál ne’e mak to’o iha loron 18 dezembru ita konsege atinje millaun 70 ne’e”, hatutan iha edifísiu tuan Ministériu Planu no Finansa nian, ohin.
Iha 2016 AA rekolla reseita hamutuk millaun U$75 no konsege ultrapasa tarjetu ne’ebé Ministériu Planu no Finansa fó mak ho montante millaun U$72.
“Mas agora tinan 2017 nian, ami tenke haree tan lai to’o fin 31 dezembru hira mak ita konsege rekolla, tanba ami mós rekoñese katak durante tinan ne’e iha fulan balun ne’ebé mak importasaun menus liu, tanba ne’e mak ho montante millaun 70”.
Tanba reseita alfándega depende ba movimentu merkadu, kuandu importasaun maka’as nia sa’e, bainhira redúz nia reseita mós menus, maibé tuir estimasaun iha fin anu ne’e AA bele hetan to’o millaun U$73.15.
Jornalista: Maria Auxiliadora
Editora: Rita Almeida
