DILI, (TATOLI) – Eskola Sekundáriu Tékniku Vokasionál-Grupu Teknolojia Indústria Bekora (ESTV-GTI) kontinua hetan tulun hosi profesór ne’ebé Governu Korea oferese liuhusi ninia ajénsia KOIKA (Korea International Cooperation Agency).
Diretór ESTV-GTI Bekora, Francisco Guterres, hateten fulan oin governu Korea do Súl liuhosi ajénsia KOIKA sei haruka tan profesór voluntáriu nain rua hodi hanorin iha eskola tékniku vokasionál ne’e.
ʺProfesór voluntáriu nain rua ne’e sei hanorin iha área Teknolojia Informatika (IT) ho área mekanika durante tinan rua, maibé nain haat seluk oras ne’e voluntáriu ona iha eskola ne’e nain tolu hanesan profesór lian Korea no ida seluk asesorʺ, dehan Diretór ESTV-GTI ba ajensia Tatoli iha Bekora, ohin.
Tuir diretór ne’e ho prezensa profesór voluntáriu nain rua iha fulan oin sei tulun profesór timoroan sira atu hanorin iha área tékniku.
ʺHo profesór voluntáriu nain rua ne’e ami nia profesór sira bele manan esperensia kona-ba tékniku iha área rua ne’eʺ, tenik.
Totál profesór iha ESTV-GTI Bekora hamutuk ema 83, administrasaun tolu, guarda seguransa tolu, jardineiru tolu.
Koperasaun ne’e ESTV-GTI no Governu Korea liuhosi KOIKA estabelese ona hahú kedas iha tinan 2012 to’o oras ne’e.
Jornalista: Agapito dos Santos
Editora: Rita Almeida
