DILI, (TATOLI) – Ministériu Negósiu Estranjeiru no Kooperasaun (MNEK) ohin observa kondisaun sede CPLP (Comunidade dos Países da Língua Portuguesa) ne’ebé lokaliza iha Praia dos Coqueiros.
Vise-ministra, Adalgiza Magno, hatete observasaun katak kondisaun sede CPLP ne’e jeralmente di’ak no moos maske iha buat ki’ik balun ladi’ak. Fatin ne’e responsabilidade MNEK nian.
“Iha buat balun ne’ebé ki’ik-ki’ik oan aat, hanesan odamatan nakles, haree oinsá atu hadi’a”, haktuir governante ne’e hafoin halo observasaun.
Na’in ba sede ne’e mak membru CPLP hanesan Angola, Brasil, Cabo Verde, Guiné-Bissau, Guiné Equatorial, Moçambique, Portugal, São Tome e Príncipe no Timor-Leste.
Tanba lokaliza iha Dili, Estadu Timor-Leste mak responsabiliza. Iha pedidu barak atu uza fatin ne’e, maibé CPLP hakarak uza hanesan reprezentasaun, sentru kulturál no sentru informasaun CPLP nian.
“Uma ne’e ita mak tenke toma konta ne’ebé ita mai haree. Uma ne’e la’ós Timor nian mesak, uma ne’e rai CPLP hotu-hotu nian”, katak tan.
Kona-ba orsamentu atu hadi’a buat ki’ikoan sira ne’ebé mak aat nia informa orsamentu iha. “Orsamentu manutensaun iha”, subliña vise-ministra ne’e, la mensiona kuantidade orsamentu ba manutensaun ne’ebé prevé hodi hadi’a kondisaun sede ne’e.
Entretantu TATOLI observa mós katak sede komunidade luzofóna ne’e cleaner sira hamoos no organizadu inklui hetan seguransa másima husi seguransa sívil sira.
Jornalista: Rafy Belo
Editora: Rita Almeida
