DILI, (TATOLI) – Kontentór sia ne’ebé foin daudaun hetan apreensaun iha Portu Dili husi órgaun Polísia Kriminál, ida hahán ba ikan no bo’ek no ualu seluk mak matéria prima atu halo medikamentu.
Diretór Jerál Autoridade Aduaneira, José António Fátima Abílio, hatete kontentór ualu ne’e ho matéria prima PT. Sehat Sejahtera nian, husi Indonézia ne’ebé importa mai Timor-Leste no husu atu esporta ba Indonézia ho nia destinasaun ba Jakarta.
Matéria prima ne’e to’o iha portu Dili iha agostu 2017 no iha tinan ne’e maka atu esporta tanba prienxe ona rekizitu esportasaun nian no antes ne’e alfándega no Ministériu Saúde (MS) koordena hamutuk tanba kona-ba medikamentu ne’ebé tama iha Portu Dili tenke hetan autorizasaun husi Ministériu Saúde.
Autorizasaun ne’e la’ós halo de’it ba kontentór ualu ne’e, maibé ba aimoruk hotu ne’ebé tama iha portu tenke prienxe rekizitu MS nian para labele fó implikasaun ba saúde públiku, maibé tanba matéria prima maka MS fó kompeténsia ba Alfándega atu prosesa merkadoria ne’e hodi prosede ba esportasaun.
“Proseu ne’e la’o depois iha setembru, outubru no dezembru ho ró Xina nia mai para fó asisténsia sosiál ne’e perturba prosesu komérsiu no iha ne’ebá ita tenke fó prioridade ba 9 bahan pokok no lafó prioridade ba matéria prima sira ne’e”, katak José iha edifísiu Autoridade Aduaneira, ohin.
Nune’e alfándega investiga dokumentu kompañia nian no dokumentu sira ne’e mai liuhusi Singapura no país ne’e mós halo teste ba materiá prima antes haruka mai Timor-Leste.
“Matéria prima la’ós droga. Matéria prima atu prodús aimoruk, aleinde teste husi Singapura depois sira mós halo letter statement (karta deklarasaun) ida dehan ne’e sira lori atu halo produsaun ba aimoruk. Karta ne’e husi instituisaun ida ne’ebé responsabiliza halo análize ba matéria prima ne’e no aneksa hamutuk ho dokumentu sira ne’e. Alfándega haree no análize hotu nia prienxe rekizitu hotu, haree ba rekizitu interna nia iha lisensa rejistada iha SERVE, iha númeru TIN impostu nian”.
Hafoin kompañia Naroman Timor hanesan broka prosesa dokumentu importasaun ne’e no selu taxa normál tanba husi Singapura ne’e atu importa mai Timor-Leste.
“Depois nia selu taxa, nia husu atu esporta, la’ós reesporta tanba nia destinu finál iha Timór. Agora nia husu atu esporta, Alfándega haree fali, hatama pedidu esportasaun nian kompletu hotu, agora kompleta hotu tiha nia prosedimentu nian, antes atu hasai Alfándega tenke halo nick test tuir ekipamentu teste ne’ebé Alfándega iha, bolu nia na’in mai prezensa ho ekipa Alfándega nian hodi teste haree nia rezultadu no negativu”.
Teste ne’e halo uluk ba kontentór ida antes intervesaun husi Polísia Marítima nian. Nick Teste ne’e halo tanba iha aimoruk reagen ida ne’ebé foti amostra husi matéria prima no hatama, bainhira muda kór maka ne’e matéria droga nian, maibé lamuda no rezultadu negativu. “Kundu tula ona mak foin iha intervensaun husi Polísia Marítima”.
Intervensaun Atividade Merkadoria Ne’e Kompeténsia Alfándega
Diretór Jerál Autoridade Aduaneira, José António Fátima Abílio, hatete Unidade Polísia Marítima iha kompeténsia atu halo kontrola, maibé kona-ba intervensaun atividade merkadoria nian liuliu importasaun no espotasaun ne’e kompeténsia Alfándega nian.
Alfándega tuir lei 14/2017 no 9/2014 fó kompeténsia katak Alfándega tuir lei nia iha kontrolu transporte fronteira terrestre, fronteira marítima no aéreu”.
“Sasán kuandu ko’alia kona-ba importasaun no esportasaun ne’e kompaténsia Alfándega nian mas iha portu ne’e hanesan zona franka ne’ebé iha ne’ebá Alfándega mak iha kompeténsia tomak atu halo kontrolu iha ne’ebá”, dehan José iha edifísiu Autoridade Aduaneira.
Hatutan APORTIL nia halo jestaun ba portu, maibé kontrola merkadoria sira ne’e iha knaar Alfándega nian.
“Unidade Polísia Marítima, nia bele iha ne’ebá kontrola, halo observasaun buat ne’ebé relasiona ho importasaun sira tan zona livre, nia mós tenke proteje ema nia sasán iha ne’ebá, maibé la’ós nia kompeténsia atu halo intervensaun ba merkadoria sira, ne’e kompeténsia Alfándega nian”.
Instituisaun seluk ne’ebé hakarak halo intervensaun ba serbisu Alfándega nian tenke kumpri regra legál ne’ebé iha.
“Nia tenke mai koordena ou se nia iha informasaun ruma ne’ebé dehan ne’e droga, nia tenke mai serbisu hamutuk ho Alfándega lori ba investiga, bainhira iha investigasaun ne’e mós Alfándega mak iha podér atu loke kontentór, sira haree de’it depois dehan ida ne’e ami deskonfia entaun hasai amostra halo teste mas ne’e kompeténsia Alfándega nian laiha ida halo intervensaun ba liu iha ne’ebá”.
Bainhira atu halo intervensaun ba serbisu Alfándega nian atu foti kontentór ruma tenke iha madadu husi Tribunál.
“Se mandadu husi tribunál singinifika mandadu ne’e sei liuhusi PSIK, polísia judisiáriu ho desizaun tribunál nian bá halo intervensaun iha instituisaun Estadu seluk nian, la’ós marítima mak atu halo. Nia bele deskonfia, nia bá koordena ho instituisaun seluk, ho Alfándega, informa ba intelijénsia seluk, la’ós Polísia Marítima mak halo intervensaun direta, ne’e ita viola ona lei la’ós nasionál de’it mas internasionaál tanba iha ne’ebé de’it Alfándega mak responsabiliza ba importasaun no esportasaun merkadoria”.
Bainhira deskonfia tenke koordena tanba instituisaun Estadu hotu lori salva guarda país husi droga, ne’ebé tenke respeita funsaun instituisaun ida.
Enkuantu importasaun tuir Alfándega tuir rekizitu hotu. “Agora Polísia Marítima halo intervensaun, se nia hatene dehan droga nusá mak kontentór para iha ne’ebá (Portu) bainhira tun ne’e ka’er kedan, ne’e iha buat ruma ne’ebé funsiona laloos”.
Kontentór 9 Ne’ebé Hetan Apreensaun Husi Autoridade Polisiál Laiha Substánsia Psikotrópika
Entretantu tuir komunikadu ne’ebé Tatoli asesu antes ne’e hosi Autoridade Aduaneira (AA) katak, apreensaun ba kontentór 9 ne’ebé hala’o iha portu Dili foin lalais ne’e husi autoridade polisiál tanba suspeita kontein substánsia proibida, nune’e AA tuir lei halo inspesaun ba merkadoria ne’e no hasai amostra hodi halo análize ba kontrola substánsia psikotrópika hatudu rezultadu teste negativu.
Nota komunikadu ne’e hatutan bainhira ko’alia kona-ba esportasaun, tuir lei, merkadoria ne’e iha fiskalizasaun Alfándega nian, kabe ba AA deside tuir nia kompeténsia hodi halo inspesaun bainhira sasán na’in tenke iha oin hanesan lei hatete, nune’e foti amostra husi substánsia (bahan baku) ne’e hodi halo teste.
“Nune’e ita atua iha ámbitu lei nian no prátika internasionál ne’ebé di’ak, Autoridade Aduaneira iha sirkunstánsia ne’ebé de’it hodi hatudu katak laiha indikasaun evidénsia ruma ba prátika kualkér krime ou kontraordenasaun”, refere komunikadu hodi hatán publikasaun notísia iha mídia sobre kontetór 9 ne’ebé deskonfia importa sasán proibida nian.
Kontentór ne’e to’o iha Timor-Leste iha trimestre daruak 2017, ne’ebé importadór prosesa ona iha AA hodi halo nia deklarasaun aduaneira ho nia dokumentu komprovativu seluk hodi solisita ba rejime introdusaun iha konsumu merkadoria ne’ebé deklara hanesan substánsia hodi halo aimoruk no kumpri hotu prosedimentu legál.
“Halo tiha análize ba dokumentu ne’e hotu no haree katak nia kumpri rekizitu hotu tuir lei, importadór halo pagamentu ba taxa no impozisaun sira seluk tuir regra ne’ebé estabelese iha lei aduaneira no tributária”.
Nune’e iha 2018 importadór entrega ba AA deklarasaun esportasaun ida hodi solisita atu halo esportasaun merkadoria refere ba Repúblika Indonézia.
Jornalista: Maria Auxiliadora
Editora: Rita Almeida
