DILI, (TATOLI) – Tempu badak, Governu Timor-Leste ho Singapura sei halo konferénsia hamutuk iha Singapura hodi atria investidór sira, liu-liu investidór sira husi Singapura hodi investe iha nasaun ne’e.
Tuur hamutuk ho sira depois esplika polítika investimentu iha Timor-Leste, planu dezenvolvimentu inklui kuadru legál, fasilidade saida de’it ne’e para bele halo investimentu iha ne’e. Governu Singapura rasik fó apoiu tomak ba ne’e.
“Agora ligasaun ho saida mak ita prepara, ita iha TradeInvest. Ne’ebé mais téknika, mais espesífiku TradeInvest mak sei halo esplikasaun kle’an liutan kona-ba rekizitu investimentu iha ita-nia rai laran durante konferénsia ne’e”, Ministru Negosiu Estranjeiru no Koperasaun, Aurélio Guterres, hatan ba TATOLI iha MNEK Praia dos Coqueiros, tersa ne’e.
Nia dehan sei konvida timoroan, emprezáriu nasionál sira ne’ebé mak interese atu serbisu hamutuk ho emprezáriu internasionál sira ne’e atu bele halo investimentu ida pozitivu, lukrutivu nomós bele benefísia ita-nia rai laran liu-liu kampu traballu iha ita-nia rai laran. Pontu ida kona-ba investimentu.
Pontu rua, Singapura mós prontu atu fó formasaun ba timoroan sira. Agora dadauk husi ita-nia parte, atrávez ita-nia embaixada iha Singapura nomós MNEK prepara hela programa ida.
Programa ne’e sei koordena ho ministériu relevante iha ita-nia rai laran, liu-liu identifika área espesífika hodi nune’e halo formasaun ida ba médiu prazu ho Singapura. Singapura sei apoia tomak.
“Ne’ebé ita planu, planu formasaun ba ita-nia ema sira iha setór hotu-hotu, hodi tuir formasaun iha Singapura”, katak tan.
Hodi hatutan konferénsia ne’e tuir planu, bele iha fulan tolu eh haat nia laran ne’e, ita bele realiza lais liutan porque ne’e pratikamente singapura mak fó apoiu iha ne’ebá. Ita mobiliza de’it buat balun, ita koordena de’it buat balun hodi nune’e ita bele fó apoiu ba realizasaun ne’e.
Ema Hakarak Investe iha Timor-Leste
Ministru Aurélio mós haktuir durante nia vizita traballu iha Singapura no Indonézia inklui nasaun balun, sira hateten Timor-Leste nasaun ne’ebé úniku, nunka espera to’o iha situasaun ida diverjénsia polítika, povu kumprende.
Rai ida ne’e bele iha dezentendimentu polítiku, diskusaun polítiku sira iha Parlamentu Nasionál, buat ida ne’ebé ema barak, rai barak la espera.
Enkontru iha Singapura, Indonézia, sira dehan ita-nia rain ema bele iha diverjénsia polítika, i bele deskute malu mas povu kumprende. Ema hatene saida mak polítika no la kahur ho vida loro-loron ida.
Sei la afeta investimentu, ema hakarak mai investe nafatin. Soké ita mak presiza prepara meius hanesan kuadru legál. Ema hakarak mai investe tanba iha estabilidade polítika, iha oportunidade para ema hakarak mai investe.
“Ha’u sente sei sei la afeta ema mai halo investimentu iha ne’e, ema kontinua hakarak, depende ita mak tenkeser prepara aan para simu ema sira ne’e halo didi’ak liu-liu husi kuadru legál no seluk tan”, konklui.
Jornalista: Rafy Belo
Editora: Rita Almeida
