DILI, (TATOLI) – Sekretáriu Estadu Juventude no Traballu (SEJT), Nívio Leite Magalhães, sei anúnsia ba públiku kona-ba rezultadu auditoria iha SEJT nian sobre irregularidade ne’ebé akontese iha ámbitu halo selesaun ba traballadór sira ne’ebé bá serbisu iha Austrália no Korea.
Tanba programa saida de’it mak implementa iha SEJT sei latolera atu korrupsaun, koluzaun no nepotizmu (KKN) ba sé de’it mak komete, nune’e tenke responsabiliza.
“Liga bá programa Korea no Austrália ne’e ba timoroan hotu la’ós ba família, grupu ka partidu ida, ne’e labele akontese tan. Orsamentu ne’ebé iha, programa ne’ebé iha ne’e povu nian atu serbí povu tanba bainhira ita ko’alia kona-ba povu ne’e povu hotu-hotu, timoroan hotu iha direitu ba programa ida ne’e”, Nívio hatete iha Jináziu Dili, ohin, bainhira halo diálogu ho joven sira sobre programa Korea no Austrália nian.
Bainhira iha auditoria ne’e mak hetan funsionáriu balun ka kargu xefia ruma envolve iha irregularidade ida ne’e, Nívio dehan hotu-hotu tenke hakruk ba lei ne’ebé iha.
“Ita hotu iha lei nia okos, tratamentu ba hotu hanesan ba funsionáriu sira hotu inklui sekretáriu Estadu. Ezemplu selesaun ba rai-liur, ha’u hanesan sekretáriu Estadu mós labele rekomenda ka hili fali ema ida atu bá liur, sé de’it tenke tuir selesaun, satán agora iha traballadora na’in-ida latuir teste médiku nia bá de’it no sé mak responsabiliza ba ida ne’e tenke hatán no asume responsabilidade tanba atu sira ne’e implika ba imajen Timor-Leste nian iha rai-liur”.
Nune’e iha semana mai ne’e sei fó sai atu públiku bele hatene saida mak akontese tanba laiha segredu ida nomós atu asegura bá oin programa ida ne’e tenke la’o ho di’ak.
Entantu iha sorumutuk ne’ebé organiza husi SEJT ne’e, joven sira krítika maka’as sobre lala’ok selesaun ba serbisu iha estranjeiru ne’e tanba deskonfia iha sistema familiarizmu katak funsionáriu balun hatama nia família.
Hatán ba ida ne’e, Nívio dehan simu ona rezultadu auditoria nian no semana oin sei foti desizaun katak sé mak sala dehan sala.
Jornalista: Maria Auxiliadora
Editora: Rita Almeida
