MANATUTU, (TATOLI) – Konkordata ne’ebé Estadu Vatikanu, Igreja Timor-Leste no Governu Timor-Leste asina ona iha foin lalais liu-ba define katak bainhira atu harii kapela ka igreja tenke hetan autorizasaun hosi Sekretariadu Konferénsia Episkopál (SKE).
Primeiru-Ministru, Marí Alkatiri, hato’o kestaun ne’e bainhira hatan komunidade sira nia preokupasaun kona-ba kapela aat liuhusi eventu konsultasaun programa Sétimu Governu Konstitusionál iha salaun Parókia Santu António Manatutu, sesta (16/2).
Iha konkordata ne’e nia haktuir tinan-tinan Governu sei aloka orsamentu ba Sekretariadu Konferénsia Episkopál ho montante miloens $15 ho objetivu atende projetu sira ne’ebé liga ba igreja ka kapela.
Marí haktuir SKE maka bele haree katak presiza duni kapela, ka igreja, depois maka fó informasaun ba Governu. Tanba antes ne’e eis governante balun ho unilateralmente harii kapela haat iha nia suku rasik sein halo koordenasaun ho SKE.
“Ne’e maka akordu entre Igreja Timor-Leste ho Estadu Vatikanu nomós Igreja Katólika ho Governu Timor-Leste. Tanba ne’e labele husu direta mai iha Governu”, dehan.
Jornalista: Xisto Freitas
Editora: Rita Almeida