DILI, (TATOLI) – Inspesaun ne’ebé hala’o husi Sekretáriu Estadu Juventude no Traballu (SEJT), Nívio Leite Magalhães, iha edifísiu SEJT deteta funsionáriu balun iha tempu serbisu nian halibur malu no lahala’o nia knaar ho di’ak nomós balun latama serbisu.
Nune’e Nívio sei bolu xefe departamentu ka diretór relevante atu fó xamada atensaun tanba iha ema barak mak hakarak sai funsionáriu, maibé seidauk hetan oportunidade hanesan sira.
“Funsionáriu sira iha durante oras serbisu, oras ualu loron ida ne’e atu hala’o kanaar tuir estatutu Funsaun Públika nian, nune’e tenke hala’o duni serbisu. Labele ita sai tiha funsionáriu depois latama serbisu, ida ne’e labele. Ha’u tenke asegura funsionáriu tama serbisu tuir oras ne’ebé deside tuir lei Funsaun Públika no bainhira iha serbisu fatin tenke hala’o duni knaar tuir deskrisaun serbisu ne’ebé hetan ona”, Nívio hatete hafoin halo inspesaun ba patrimóniu estadu nian nomós vizita diresaun sira iha SEJT ne’e iha Kaikoli, ohin.
Nune’e sei latolera atu sira hanesan ne’e tanba funisonáriu sira tenke tama serbisu oras ualu, se sira laiha tenke iha justifiksaun, karik bá enkontru nomós atividade seluk ne’ebé liga ba sira-nia knaar.
Bainhira sira lahalo knaar loloos maka iha estatutu Funsaun Públika nian ko’alia kona-ba funsionáriu karik latama serbisu tenke iha mós sansaun balun ba sira.
Tanba hetan ona oportniudade tenke uza didi’ak tempu ne’ebé iha hodi hala’o knaar hodi serbí povu no nasaun.
Aleinde ne’e iha inspesaun ne’ebé halo ba patrimóniu estadu nian hetan katak iha komputadór balun ne’ebé nakonu ho filme de’it, nune’e Nívio hato’o ba funsionáriu sira atu hamoos no labele rai tan filme sira ne’ebé laimportante no larelevante ho serbisu iha Estadu ne’e.
“Tanba fasilidade sira ne’e atu fasilita funsionáriu sira hotu hodi hala’o sira-nia serbisu atu serví povu no nasaun, maibé bainhira iha filme barak iha laran iha fatin balun (diresaun iha SEJT nian) funsionáriu balun xave tiha odamatan no halibur malu iha sala ida iha oras serbisu, ida ne’e ita labele tolera”.
Jornalista: Maria Auxiliadora
Editora: Rita Almeida
