DÍLI, (TATOLI)-Universidade Orientál Timor Lorosa’e (UNITAL) iha tinan létivu ida ne’e, molok hahú prosesu aprendizajen ba estudante sira hahú uluk ho formasaun karaktér ba estudante foun sira.
“Hakarak forma sira sai ema ida ne’ebé mak profisionál tanba liu husi formasaun ida ne’e, ita oinsá bele kapasita sira, kaderniza sira, forma sira sai ema ida ne’e mak intelektuál, iha potensialidade,” dehan xefe komisaun organizadora, Jacob Goveia Leite, ba Ajénsia TATOLI, ohin iha Kampus UNITAL, Becora-Díli.
Tanba liuhusi formasaun sira hanesan ne’e ita bele hateten katak antes prosesu aprendizajen la’o, tenke liuhusi formasaun ne’ebé mak adekuada.
“Oinsá bele kapasita estudante sira, bele aumenta sira-nia mentalidade hodi bele adopta situasaun ensinu nian liuhusi formasaun ne’ebé mak estabelese husi Komisaun Organizadora,” argumenta estudante departamentu Nutrisaun, Fakuldade Siénsia no Saúde ne’e.
Nia mós informa, natureza atividade molok prosesu aprendizajen hahú, liliu ba estudante foun sira tinan létivu ne’e diferente tebes tanba sira fó formasaun de’it no evita agresaun sira.
Totál Komisaun Organizadora, ne’ebé ajuda fasilita prosesu formasaun ne’e kompostu husi estudante ativu na’in 80, reprezenta husi fakuldade ualu hanesan Fakuldade Direitu, Fakuldade Siénsia Polítika, Fakuldade Ekonomia, Fakuldade Siénsia Téknika.
Tuir mai, Fakuldade Agrikultura, Fakuldade Edukasaun no Fakuldade Siénsia no Saúde.“Ami estabelese komisaun ida ne’e ho objetivu atu asegura estabilidade. Tanba ne’e, nu’udar xefe komisaun, observa, durante prosesu formasaun, agora tama ona ba etapa segundu, la iha agresaun, entre estudante ho kandidatu foun,” nia haktuir.
Kandidatu estudante UNITAL, Olimpia Oliveira dehan katak nia sente kontente tebes ho formasaun ne’e tanba formasaun ne’e la’o pozitivamente.
Nia mós informa katak nia tama UNITAL hili departamentu Komunikasaun Sosiál tanba hakarak sai jornalista iha futuru.
“Ha’u mai iha ne’e atu foti Komunikasaun Sosiál, atu nune’e hatene kle’an liutan kona-ba informasaun iha rai laran nomós iha rai li’ur,” hateten kandidatu estudante UNITAL ne’e.
“Ha’u haree mós iha TV edukasaun, RTTL [Rádiu no Televizaun Timor-Leste] nomós seluk tan, sira asesu lalais kona-ba informasaun,” alumni Eskola Sekundáriu 10 Dezembru ne’e reforsa.
Antes ne’e, atividade formasaun ne’e halo abertura diretamente husi Prezidente Fundasaun Aswa’in, Lere Anan Timur, nu’udar mós fundadór ba Universidade ne’e.
(Jornalista: Rafy Belo)
(Editór : Manuel Pinto)
