DILI, (TATOLI) – Kada loron Sentru Informasaun Turístika (SIT) hetan vizitante ka turista kuaze ema na’in-rua to’o haat husi nasaun oioin mak hakarak atu hatene informasaun jerál sobre turizmu Timor-Leste nian.
Administradór SIT, António da Silva, hatete turista sira ne’ebé vizita fatin ne’e barak liu husi Austrália, Nova Zelándia, Itália, Olanda, Irlanda, Reinu Unidu, Papua Nova Giné no nasaun sira iha Ázia hanesan Japaun, Malázia no seluk tan.
“Informasaun ne’ebé sira husu ne’e maioria informasaun jerál kona-ba turizmu nian no barak liu ne’e husu kona-ba transporte husi Dili atu bá Oekusi ne’e maizumenus akomodasaun saida mak iha ne’ebá atubele fasilita sira, transporte iha ne’ebá ne’e presu oinsá mas balun mai husu kona-ba koneksaun ka transporte distritu nian oinsá no atividade ne’ebé mak sira bele hala’o iha Dili laran”, António relata iha SIT Lesidere, ohin.
SIT mós iha baze dadus kona-ba koneksaun trasporte liuliu terminál sira ne’e nomós mikrolete numéru hira mak halai bá diresaun ida ne’ebé no taksi sira ne’ebé halai iha Dili laran no nia presu. Entantu difikuldade barak mak informasaun liuliu restaurante balun ne’ebé lokaliza iha munisípiu dalaruma númeru telefone laativu no negósiu ne’e mós laeziste tiha.
“Depois ema atu bá lokalizasaun mapa ne’ebé detalla ne’e seidauk iha, maibé iha hanoin elabora ona mas seidauk prontu. En jerál informasaun ne’ebé ita dirije ba ne’e di’ak, agora saida mak atu halo ne’e presiza atualiza”.
Atubele fasilita turista sira bele la’o iha Dili, Ministériu Turizmu mós prodús mapa Dili nian nomós mapa espesífiku ba eko-turizmu nian bainhira sira iha interese ba ida ne’e atubele iha koñesimentu sobre fatin sira ne’ebé hakarak atu bá.
“Kona-ba informasaun ne’ebé ami tranzmite ba ne’e ita tenke realístiku labele ko’alia iha ne’ebá ne’e iha no kondisaun kapa’as to’o ikus la akontense, ne’e ladún di’ak ne’ebé ami realístiku”.
SIT ida ne’e inaugura ona husi Primeiru-Ministru, Marí Alkatiri, iha 12 marsu 2018. Iha inaugurasaun ne’e PM hatete SIT ne’e hanesan parte importante ba Timor-Leste atubele fasilita prosesu fahe informasaun ba sidadaun sira nomós ema estranjeiru sira atu hatene kona-ba sítiu turístika ne’ebé eziste iha país ne’e.
“Sentru ida ne’e iha nia funsaun rasik para atu informa ba poténsia turista ou investidór turístiku sira ba ita-nia potensialidade iha ne’ebé ba ita-nia lokál istóriku no kulturál ne’ebé interese ba turizmu”.
Ministru Turismu, Manuel Vong, katak SIT ne’e hanesan fatin ida ne’ebé atu hetan informasaun, objetivu prinsipál harii SIT ne’e mak atu promove setór turizmu liuhusi publikasaun oioin atu vizitante sira bele asesu, liuliu turista sira ne’ebé hakarak buka informasaun kona-ba fatin destinasaun turístika iha kapitál Dili liga ba munisípiu sira seluk ne’ebé tama iha zona sentru ne’e.
Hafoin inaugura sentru ne’e funsiona no simu ona bainaka sira husi nasaun oioin ho númeru ne’ebé seidauk barak entantu divulga informasaun sobre Timor-Leste kontinua la’o liuhusi pájina ofisiál turizmu nian ne’ebé iha informasaun jerál kona-ba perfil munisípiu, akomodasaun, nomós social media networking ka facebook ne’ebé mak sei publika informasaun sira.
Jornalista: Maria Auxiliadora
Editora: Rita Almeida
